బంగాళాఖాతంలో అల్పపీడనం..

24న ఉత్తరాంధ్ర–దక్షిణ ఒడిశా తీరాల మధ్య తీరం దాటే అవకాశం

సూర్య కరీంనగర్ ప్రతినిధి :

పశ్చిమ మధ్య, దానికి ఆనుకుని ఉన్న వాయువ్య బంగాళాఖాతంలో కొనసాగుతున్న వాయుగుండం (డిప్రెషన్) గత ఆరు గంటల్లో గంటకు 18 కిలోమీటర్ల వేగంతో పశ్చిమ దిశగా కదిలింది. మంగళవారం ఉదయం 8.30 గంటలకు ఇది 17.9° ఉత్తర అక్షాంశం, 86.0° తూర్పు రేఖాంశం వద్ద కేంద్రీకృతమై ఉంది.ఇది ఒడిశాలోని గోపాల్‌పూర్‌కు సుమారు 200 కి.మీ. ఆగ్నేయంగా, ఆంధ్రప్రదేశ్‌లోని కళింగపట్నానికి 200 కి.మీ. తూర్పు-ఆగ్నేయంగా, పూరీకి 210 కి.మీ. దక్షిణంగా, విశాఖపట్నానికి 290 కి.మీ. తూర్పున ఉన్నట్లు భారత వాతావరణ శాఖ తెలిపింది.రానున్న 12 గంటల్లో వాయుగుండం పశ్చిమ-వాయువ్య దిశగా కదులుతూ తీవ్ర వాయుగుండంగా (డీప్ డిప్రెషన్) బలపడే అవకాశం ఉంది. అనంతరం ఇదే దిశలో కొనసాగుతూ సెప్టెంబర్ 23 రాత్రి నుంచి 24వ తేదీ తెల్లవారుజామున మధ్య ఉత్తర ఆంధ్రప్రదేశ్–దక్షిణ ఒడిశా తీరాల మధ్య విశాఖపట్నం, గోపాల్‌పూర్ మధ్య డీప్ డిప్రెషన్‌గా తీరం దాటే అవకాశం ఉందని వాతావరణ శాఖ వెల్లడించింది.