పాకిస్తాన్లో మరో పరువు హత్య: నవవధువును కాల్చి చంపిన సొంత సోదరుడు.. కరాచీలో దారుణం
సూర్య అంతర్జాతీయ డెస్క్: పాకిస్తాన్లో పరువు హత్యల పేరిట మహిళలపై జరుగుతున్న అమానవీయ దాడులు ఆగడం లేదు. తాజాగా దేశంలోని అతిపెద్ద వాణిజ్య నగరం కరాచీలో నవవధువు దారుణ హత్యకు గురైంది. తన ఇష్టపూర్వకంగా వివాహం చేసుకుందన్న కక్షతో 18 ఏళ్ల యువతిని ఆమె సొంత సోదరుడే తుపాకీతో కాల్చి చంపిన హృదయవిదారక ఘటన ఒరంగి టౌన్ పరిధిలో చోటుచేసుకుంది. సమాచారం అందుకున్న మోమినాబాద్ పోలీసులు ఘటనా స్థలానికి చేరుకుని మృతదేహాన్ని స్వాధీనం చేసుకుని పోస్ట్మార్టం నిమిత్తం అబ్బాసీ షహీద్ ఆసుపత్రికి తరలించారు. నిందితుడిపై హత్య కేసు నమోదు చేసి గాలింపు చర్యలు ముమ్మరం చేశారు.
పోలీసులు తెలిపిన వివరాల ప్రకారం.. స్థానిక నివాసి అయిన 18 ఏళ్ల జర్కా బీబీ సుమారు మూడు వారాల క్రితం కుటుంబ సభ్యుల ఇష్టానికి వ్యతిరేకంగా తనకు నచ్చిన వ్యక్తిని ప్రేమించి పెళ్లి చేసుకుంది. అనంతరం భర్తతో కలిసి వేరుగా కాపురం ఉంటోంది. అయితే ఆమె ఆచూకీ తెలుసుకున్న కుటుంబ సభ్యులు, సంప్రదాయబద్ధంగా అందరి సమక్షంలో అధికారిక వివాహ వేడుక జరిపిస్తామని నమ్మబలికి ఆమెను పుట్టింటికి రప్పించారు. కుటుంబ సభ్యుల మాటలను నమ్మి ఆదివారం రాత్రి ఆమె తన పుట్టింటికి చేరుకోగా, తీవ్ర ఆగ్రహంతో ఉన్న ఆమె సోదరుడు సఫీర్ ఖాన్ తుపాకీతో విచక్షణారహితంగా కాల్పులు జరిపాడు. తీవ్ర గాయాలపాలైన జర్కా బీబీ అక్కడికక్కడే ప్రాణాలు కోల్పోగా, నిందితుడు పరారయ్యాడు.
పాకిస్తాన్లో మహిళల స్వేచ్ఛాయుత వివాహ నిర్ణయాలను కుటుంబ పరువుకు ముడిపెడుతూ హత్యలు చేయడం సర్వసాధారణంగా మారింది. కేవలం కొద్ది రోజుల క్రితమే అదే ప్రాంతంలో ప్రేమ వివాహం చేసుకున్న అబ్బాస్ అలీ అనే యువకుడిని అత్తమామల కుటుంబం కాల్చి చంపిన ఘటన మరువకముందే ఈ దారుణం వెలుగుచూడటంతో స్థానికంగా భయాందోళనలు వ్యక్తమవుతున్నాయి. కఠిన చట్టాలు ఉన్నప్పటికీ లొసుగులు, న్యాయపరమైన జాప్యం మరియు సామాజిక ఒత్తిళ్ల కారణంగా నిందితులకు శిక్షలు పడటం లేదని మానవ హక్కుల సంఘాలు తీవ్ర ఆవేదన వ్యక్తం చేస్తున్నాయి. పరారీలో ఉన్న సఫీర్ ఖాన్ను పట్టుకునేందుకు ప్రత్యేక పోలీసు బృందాలు గాలింపు చేపట్టినట్లు ఉన్నతాధికారులు వెల్లడించారు.
