రాష్ట్రంలో ఎల్‌నినో ప్రభావంపై కేబినెట్‌ సుదీర్ఘ చర్చ.. అఖిలపక్ష సమావేశానికి సీఎం రేవంత్ ఆదేశం
హైదరాబాద్:, సూర్య ప్రతినిధి :తెలంగాణలో ఎల్‌నినో ప్రభావంతో తలెత్తిన తీవ్ర వర్షాభావ పరిస్థితులు, కరువు సంక్షోభంపై రాష్ట్ర మంత్రిమండలి సమావేశంలో సుదీర్ఘంగా చర్చించారు. రాష్ట్ర వ్యాప్తంగా దాదాపు 235 మండలాల్లో వర్షపాతం గణనీయంగా తగ్గి తీవ్ర కరువు పరిస్థితులు నెలకొన్నాయని అధికారులు కేబినెట్‌కు వివరించారు.
ఈ పరిస్థితుల దృష్ట్యా రైతాంగాన్ని, ప్రజలను ఆదుకునేందుకు తక్షణమే చేపట్టాల్సిన సహాయక చర్యలపై లోతుగా చర్చించేందుకు కేబినెట్‌ సబ్‌ కమిటీ సమావేశం కావాలని మంత్రిమండలి నిర్ణయించింది. తాగునీటి ఎద్దడి తలెత్తకుండా చూడటం, పంట నష్టపోయిన రైతులకు ఊరట కలిగించడం, ప్రత్యామ్నాయ ప్రణాళికల రూపకల్పనపై సబ్‌ కమిటీ ప్రణాళికలు సిద్ధం చేయనుంది.
కరువు పరిస్థితులను ఎదుర్కొనేందుకు రాజకీయాలకు అతీతంగా అందరి అభిప్రాయాలు సేకరించాలని ప్రభుత్వం భావిస్తోంది. ఇందులో భాగంగా, త్వరలోనే అన్ని రాజకీయ పార్టీలతో అఖిలపక్ష సమావేశం ఏర్పాటు చేయాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు. ఈ భేటీలో ప్రజాప్రతినిధులు, నిపుణుల సూచనలు తీసుకుని సమగ్ర కరువు ఉపశమన చర్యలు చేపట్టనున్నట్లు ప్రభుత్వం తెలిపింది.
