స్వచ్ఛతలో సత్తా చాటిన మాచవరం పంచాయితీ

  అంబాజీపేట మేజర్ న్యూస్ :డాక్టర్ బి.ఆర్ అంబేద్కర్ కోనసీమ జిల్లా వ్యాప్తంగా స్వచ్ఛతలో ఉత్తమ ప్రతిభ కనబర్చిన గ్రామ పంచాయతీలు, గ్రీన్ అంబాసిడర్లకు శుక్రవారం జిల్లా యంత్రాంగం ఘన సన్మానం చేసింది. అమలాపురం కలెక్టరేట్ లో జరిగిన ప్రతిష్టాత్మక "స్వచ్ఛ ఆంధ్ర - స్వర్ణ ఆంధ్ర అవార్డ్స్ (ఎస్ఎ ఎస్ఎ)" ప్రధానోత్సవ కార్యక్రమంలో జిల్లా కలెక్టర్ ఆర్. మహేష్ కుమార్, అమలాపురం ఎమ్మెల్యే ఆయితాబత్తుల ఆనందరావు, అమలాపురం ఎంపీ జి. హరీష్ బాలయోగి ల చేతుల మీదుగా అవార్డులను అందజేశారు. ఈ అవార్డుల్లో అంబాజీపేట మండలం "మాచవరం గ్రామ పంచాయతీ" రాష్ట్ర స్థాయిలో ఉత్తమ పంచాయతీగా ఎంపికై జిల్లాకే గర్వకారణంగా నిలిచింది. పారిశుద్ధ్య నిర్వహణ, చెత్త సేకరణ, మురుగునీటి నిర్వహణ, స్వచ్ఛతపై ప్రజల్లో అవగాహన కల్పించడంలో మాచవరం పంచాయతీ చూపిన ప్రతిభకు ఈ పురస్కారం లభించింది.ఈ సందర్భంగా పలువురు ప్రముఖులు మాట్లాడుతూ గ్రామ పంచాయతీ ప్రత్యేక అధికారి, ఎంపీడీఓ  బి.మమత, పంచాయతీ కార్యదర్శి కె.వి.వి సత్యనారాయణ లు పారిశుద్ధ్య నిర్వహణలో చూపిన చిత్తశుద్ధి, అంకితభావం అభినందనీయమని కొనియాడారు. వారి నాయకత్వంలో పారిశుద్ధ్య సిబ్బంది చేసిన నిరంతర కృషి వల్లే గ్రామం స్వచ్ఛతలో ఆదర్శంగా నిలిచిందని ప్రశంసించారు.
అనంతరం మాచవరంలో నిర్వహించిన ప్రత్యేక గ్రామ సభలో డిప్యూటీ ఎంపీడీఓలు కె. శ్రీనివాస్, ఎం.డి అబ్బాస్ అలీ లు పంచాయతీ కార్యదర్శి సత్యనారాయణను, పారిశుద్ధ్య పర్యవేక్షణ సిబ్బందిని, పారిశుద్ధ్య కార్మికులను ఘనంగా సత్కరించి అభినందనలు తెలిపారు. ఈ కార్యక్రమంలో గ్రామ ప్రజలు, ప్రజా ప్రతినిధులు పెద్ద సంఖ్యలో పాల్గొన్నారు.