గ్రామసభలో నిధుల లెక్కేదీ?

కొంతంగి పంచాయతీలో జనరల్‌ ఫండ్‌పై స్పష్టత కరవు

‘ఎంతో.. ఏమైందో తెలియదు’ అన్న ఇన్‌ఛార్జి కార్యదర్శి

14, 15వ ఆర్థిక సంఘం నిధుల వివరాలపైనా ప్రశ్నలు

తాగునీరు, మురుగు, వీధిదీపాల సమస్యలపై గ్రామసభలో ప్రస్తావన

శంఖవరం మేజర్ న్యూస్ 
గ్రామాభివృద్ధికి వచ్చిన నిధులెంత..? వాటితో చేపట్టిన పనులేమిటి..? ప్రజలకు వివరాలు తెలియాల్సిన గ్రామసభలోనే వీటిపై స్పష్టత లేకుండా పోయింది. శంఖవరం మండలం కొంతంగి కొత్తూరు పంచాయతీలో శుక్రవారం నిర్వహించిన గ్రామసభలో సాధారణ నిధుల వినియోగం ప్రస్తావనకు రాగా, వాటి వివరాలు తనకు తెలియవని ఇన్‌ఛార్జి కార్యదర్శి వీరబాబు చెప్పడం చర్చకు దారితీసింది. మరోవైపు తాగునీరు, పారిశుద్ధ్యం, వీధిదీపాల వంటి కనీస సమస్యలు ఇంకా పరిష్కారం కోసం ఎదురుచూస్తున్నాయని సభలో ప్రస్తావించారు.

గ్రామ ప్రత్యేక అధికారి అధ్యక్షతన గ్రామసభ నిర్వహించారు. తొలుత మహాత్మాగాంధీ చిత్రపటానికి పూలమాల వేసి నివాళులర్పించారు. అనంతరం విజయవాడ రైల్వే డివిజన్‌ సంప్రదింపుల కమిటీ సభ్యుడు, కొంతంగి కొత్తూరు జనసేన అధ్యక్షుడు గొర్లి నాగేశ్వరరావు పంచాయతీ నిధులు, గ్రామ సమస్యలను సభ దృష్టికి తీసుకొచ్చారు. సాధారణ నిధులు ఎంత ఉన్నాయి, గతంలో వాటితో ఏయే అభివృద్ధి పనులు చేపట్టారని ప్రశ్నించగా, జనరల్‌ ఫండ్‌ ఎంతో, ఏమైందో తనకు తెలియదని ఇన్‌ఛార్జి కార్యదర్శి సమాధానమిచ్చినట్లు నాగేశ్వరరావు తెలిపారు.

ఆర్థిక సంఘం నిధులపైనా..

14, 15వ ఆర్థిక సంఘం ద్వారా పంచాయతీకి వచ్చిన నిధులు, వాటి వినియోగ వివరాలు ఇవ్వాలని 2025లో సమాచార హక్కు చట్టం కింద దరఖాస్తు చేసినా ఇప్పటికీ సమాచారం అందలేదని నాగేశ్వరరావు పేర్కొన్నారు. తాను ఇన్‌ఛార్జినని, పూర్తిస్థాయిలో ఛార్జి తీసుకోలేదని చెప్పడంతో పంచాయతీ ఆర్థిక వివరాలపై స్పష్టత ఇవ్వాలని కోరారు.

కనీస సమస్యలూ సభ ముందుకు

పంచాయతీ కుళాయిల ద్వారా అన్ని ఇళ్లకూ సక్రమంగా తాగునీరు అందడం లేదని సభలో ప్రస్తావించారు. రక్షిత మంచినీటి పథకం బోరు మోటారు మరమ్మతులకు ఎంత ఖర్చు చేశారో వెల్లడించాలని కోరారు. కాల్వల్లో మురుగును తరచూ తొలగించాలని, గ్రామంతోపాటు జగనన్న కాలనీలో వీధిదీపాలు ఏర్పాటు చేయాలని కోరారు. చాలాకాలంగా మూలన ఉన్న చెత్త తరలింపు ట్రాక్టర్‌కు మరమ్మతులు చేయించి వినియోగంలోకి తీసుకురావాలని సూచించారు.

సర్వే నంబరు 80-1లోని శ్మశానవాటికను సర్వే చేసి హద్దులు నిర్ణయించాలని నాగేశ్వరరావు కోరారు. అనంతరం ఎమ్మెల్యే వరుపుల సత్యప్రభ, ఎంపీ తంగెళ్ల ఉదయ్‌ శ్రీనివాస్‌ ద్వారా అభివృద్ధికి నిధులు కోరతామని తెలిపారు.

గ్రామసభలో సర్నం గోవిందు, బద్ది లోవరాజు, నడిగట్ల ఏడుకొండలు, సర్నం పూర్ణయ్య, ఆకేటి సత్యనారాయణ, ముప్పన బుజ్జి, ముప్పన వెంకటరమణ, బర్ల దొంగబాబు, రాయి రామకృష్ణ, పర్సిన శివ, సింహాద్రి కుమార్‌ తదితరులు పాల్గొన్నారు.