పోక్సో కేసులో నిందితుడికి జైలు శిక్ష

రెండు శిక్షలు ఏకకాలంలో అమలు చేయాలని మేడ్చల్ ప్రత్యేక కోర్టు తీర్పు

మేడ్చల్, మేజర్ న్యూస్( అక్టోబర్ 1):బాలికపై లైంగిక వేధింపులకు పాల్పడిన కేసులో నిందితుడికి మేడ్చల్ ప్రత్యేక పోక్సో కోర్టు జైలు శిక్ష విధించింది. జవహర్‌నగర్ పోలీస్‌స్టేషన్ పరిధిలో 2019లో నమోదైన కేసులో విచారణ పూర్తిచేసిన కోర్టు.. నిందితుడు జోరిల్ల వెంకటయ్య నేరానికి పాల్పడినట్లు నిర్ధారించింది.కేసు విచారణలో అభియోగ పక్షం సమర్పించిన సాక్ష్యాధారాలను పరిశీలించిన ప్రత్యేక పోక్సో కోర్టు న్యాయమూర్తి కే. వెంకటేష్ నేరం రుజువైనట్లు నిర్ధారిస్తూ తీర్పు వెలువరించారు. తీర్పు ప్రకారం ఐపీసీ సెక్షన్ 354 కింద నిందితుడికి రెండేళ్ల కఠిన కారాగార శిక్షతో పాటు రూ.1,000 జరిమానా విధించారు.

Also Read: అనుమానాస్పదంగా బావిలో పడి వ్యక్తి మృతి

 అలాగే పోక్సో చట్టంలోని సంబంధిత సెక్షన్ కింద ఐదేళ్ల కఠిన కారాగార శిక్షతో పాటు రూ.2,000 జరిమానా విధించారు.అయితే రెండు శిక్షలను ఏకకాలంలో అమలు చేయాలని కోర్టు స్పష్టం చేసింది. దీంతో నిందితుడు ఐదేళ్ల కఠిన కారాగార శిక్షను అనుభవించాల్సి ఉంటుంది. కేసులో అభియోగ పక్షం తరఫున స్పెషల్ పబ్లిక్ ప్రాసిక్యూటర్ ప్రభాకర్ రెడ్డి వాదనలు వినిపించారు.బాలలపై లైంగిక నేరాలను విచారించేందుకు ప్రత్యేక పోక్సో కోర్టులు ఏర్పాటు చేయబడ్డాయి. బాధిత బాలికల గోప్యత, ప్రయోజనాలకు చట్టం ప్రత్యేక రక్షణ కల్పిస్తుంది. కేసులో సమర్పించిన సాక్ష్యాధారాలను సమగ్రంగా పరిశీలించిన అనంతరం కోర్టు నిందితుడికి శిక్ష ఖరారు చేసింది.

రిపోర్టర్ తలారి శివకుమార్.