ఓవర్‌లోడ్‌తో వ్యవసాయ మోటార్లు కాలిపోతున్నాయి.. అధిక సామర్థ్యం ట్రాన్స్‌ఫార్మర్ ఏర్పాటు చేయండి
దుద్యాల్, మేజర్ న్యూస్, (అక్టోబర్ 12): దుద్యాల్ మండల కేంద్రం శివారులో ఉన్న ట్రాన్స్‌ఫార్మర్ ఓవర్‌లోడ్ కారణంగా వ్యవసాయ మోటార్లు తరచూ కాలిపోతున్నాయని రైతులు ఆవేదన వ్యక్తం చేశారు. సమస్యను పరిష్కరించాలని కోరుతూ సోమవారం ట్రాన్స్‌ఫార్మర్ వద్ద నిరసన వ్యక్తం చేశారు.ఈ సందర్భంగా రైతులు మాట్లాడుతూ.. ట్రాన్స్‌ఫార్మర్‌పై అధిక భారం పడటంతో వ్యవసాయానికి విద్యుత్ సరఫరాలో ఇబ్బందులు ఎదురవుతున్నాయని తెలిపారు. ఈ సమస్యను గతంలోనే సంబంధిత అధికారుల దృష్టికి తీసుకెళ్లినా పరిష్కారం లభించలేదని వాపోయారు. ప్రస్తుతం చేతికి వచ్చిన వరి పంటకు నీరు అందక ఎండిపోయే పరిస్థితి నెలకొందని ఆందోళన వ్యక్తం చేశారు. ఇప్పటికైనా అధికారులు స్పందించి అధిక సామర్థ్యం కలిగిన ట్రాన్స్‌ఫార్మర్‌ను ఏర్పాటు చేసి, వ్యవసాయానికి నిరంతరాయంగా విద్యుత్ సరఫరా జరిగేలా చర్యలు తీసుకోవాలని కోరారు. రైతులు శ్రీకాంత్, మహేందర్, సాయిలు, వీరేష్, శివ తదితరులు ఈ నిరసనలో పాల్గొన్నారు.
రిపోర్టర్: రమేష్, దుద్యాల్, వికారాబాద్ జిల్లా.
