మూసీ అభివృద్ధిపై రైతులతో ముఖాముఖి:తహసీల్దారు చంద్రశేఖర్‌

ఘట్‌కేసర్ రూరల్, మేజర్ న్యూస్ (అక్టోబర్ 06) : మూసీ రివర్‌ఫ్రంట్‌ అభివృద్ధి, ల్యాండ్‌ పూలింగ్‌ అంశాలపై రైతులు, పట్టాదారులు, గ్రామస్తులతో నేరుగా చర్చించి వారి అభిప్రాయాలను తెలుసుకోనున్నట్లు తహసీల్దారు బి.చంద్రశేఖర్‌ తెలిపారు. ఇందుకోసం బుధవారం ఘట్‌కేసర్‌ రెవెన్యూ మండల పరిధిలోని పలు గ్రామాల్లో గ్రామసభలు నిర్వహించనున్నట్లు పేర్కొన్నారు. ల్యాండ్‌ పూలింగ్‌పై ప్రజల సూచనలు, అభిప్రాయాలతో పాటు సమ్మతిని కూడా స్వీకరించనున్నట్లు చెప్పారు. ప్రతాపసింగారం, కాచవానిసింగారం, ముత్తివెల్లిగూడ గ్రామాలకు సంబంధించి ప్రతాపసింగారం రైతు వేదికలో మధ్యాహ్నం 2.30 గంటలకు గ్రామసభ నిర్వహించనున్నారు. కొర్రెముల పాత గ్రామ పంచాయతీ కార్యాలయంలో మధ్యాహ్నం 3.30 గంటలకు, ఎదులాబాద్‌ పాత గ్రామ పంచాయతీ కార్యాలయంలో సాయంత్రం 4.30 గంటలకు గ్రామసభలు జరగనున్నాయి. మూసీ ల్యాండ్‌ పూలింగ్‌, రివర్‌ఫ్రంట్‌ అభివృద్ధికి సంబంధించిన అంశాలపై సంబంధిత పట్టాదారులు, రైతులు, గ్రామస్తులతో సమావేశాల్లో చర్చించనున్నట్లు చంద్రశేఖర్‌ తెలిపారు. ఈ సందర్భంగా వారి సూచనలు, అభిప్రాయాలు, సమ్మతిని నమోదు చేస్తామని పేర్కొన్నారు. సంబంధిత గ్రామాల ప్రజలు నిర్ణీత సమయానికి తమకు కేటాయించిన వేదికలకు హాజరై గ్రామసభల్లో పాల్గొనాలని తహసీల్దారు కోరారు.

లంబరాజు ఘట్కేసర్ రూరల్ రిపోర్టర్, మేడ్చల్ జిల్లా.