ఉపాధ్యాయురాలికి జిల్లాస్థాయి గౌరవం

నేటి దినపత్రిక సూర్య బ్యూరో రాజమహేంద్రవరం

గోపాలపురం మండలం రాజంపాలెంలోని నవోదయ ఆంగ్ల మాధ్యమ ఉన్నత ప్రాథమిక పాఠశాలలో ఉపాధ్యాయురాలిగా సేవలందిస్తున్న షేక్ ఖాదర్ బికి జిల్లా ఉత్తమ ఉపాధ్యాయురాలి పురస్కారం లభించింది. రాజమహేంద్రవరం శాంతినగర్‌లోని వాణిజ్య మండలి సమావేశ మందిరంలో ఆంధ్రప్రదేశ్ ప్రైవేటు అన్‌ఎయిడెడ్ పాఠశాలల యాజమాన్యాల సంఘం తూర్పుగోదావరి జిల్లా శాఖ ఆధ్వర్యంలో నిర్వహించిన అంతర్జాతీయ ఉపాధ్యాయ దినోత్సవ వేడుకల్లో ఆమెను ఘనంగా సత్కరించారు.

ఈ సందర్భంగా రాజమహేంద్రవరం నగర శాసనసభ్యుడు ఆదిరెడ్డి శ్రీనివాసు, కొవ్వూరు డివిజన్ ఉప విద్యాశాఖాధికారి ఏ. తులసీదాస్ చేతుల మీదుగా షేక్ ఖాదర్ బి ప్రశంసాపత్రం అందుకున్నారు. మూడు దశాబ్దాలుగా విద్యారంగంలో సేవలందిస్తూ విద్యార్థులకు పాఠ్యాంశాలతో పాటు జీవన, నైతిక విలువలను బోధిస్తున్నందుకు ఆమెను అభినందించారు.

వెనుకబడిన ప్రాంతాలకు చెందిన బాలబాలికలకు విద్యను అందించడంలో ఆమె చేస్తున్న కృషి ప్రశంసనీయమని అతిథులు పేర్కొన్నారు. విద్యార్థుల భవిష్యత్తును తీర్చిదిద్దడంలో ఉపాధ్యాయుల పాత్ర ఎంతో కీలకమని తెలిపారు.

కార్యక్రమంలో సంఘం జిల్లా అధ్యక్షుడు పి. కళ్యాణ్‌రెడ్డి, కార్యదర్శి పి. రామకృష్ణరాజు, కోశాధికారి పి. సురేష్ తదితరులు పాల్గొన్నారు.