మందుబాబులకు నిలయాలుగా మారుతున్న ప్రకృతి వనాలు!

సూర్య బెజ్జుర్ :

గ్రామాల పచ్చదనం, ఆహ్లాదకర వాతావరణం కోసం ఏర్పాటు చేసిన పల్లె ప్రకృతి వనాలు ప్రస్తుతం నిర్లక్ష్యానికి గురవుతున్నాయనే ఆరోపణలు వినిపిస్తున్నాయి. బెజ్జూర్ మండలంలోని పలు గ్రామపంచాయతీల పరిధిలోని పల్లె ప్రకృతి వనాలను పట్టించుకునే వారు కరువయ్యారనే విమర్శలు వెల్లువెత్తుతున్నాయి.కొన్ని ప్రాంతాల్లో పల్లె ప్రకృతి వనాలు మందుబాబులకు అడ్డాలుగా మారుతున్నాయని, రాత్రివేళల్లో అసాంఘిక కార్యకలాపాలకు కేంద్రాలుగా మారుతున్నాయని స్థానికులు ఆవేదన వ్యక్తం చేస్తున్నారు. వనాల పరిసరాల్లో పారిశుధ్యం, మొక్కల సంరక్షణ, పిచ్చిమొక్కల తొలగింపు, రక్షణ చర్యలు సక్రమంగా లేకపోవడంతో ప్రజలకు ఉపయోగపడాల్సిన ప్రాంతాలు నిరుపయోగంగా మారుతున్నాయని చెబుతున్నారు.ప్రభుత్వ నిధులతో ఏర్పాటు చేసిన పల్లె ప్రకృతి వనాలను సంరక్షించాల్సిన బాధ్యత సంబంధిత గ్రామపంచాయతీ అధికారులు, సిబ్బందిపై ఉన్నప్పటికీ పర్యవేక్షణ లోపం స్పష్టంగా కనిపిస్తోందని ప్రజలు ఆరోపిస్తున్నారు. వనాల వద్ద కనీసం హెచ్చరిక బోర్డులు, లైటింగ్, పరిశుభ్రత, మొక్కల సంరక్షణ వంటి చర్యలు చేపట్టాలని కోరుతున్నారు.

• అధికారులు ఇకనైనా స్పందించాలి

బెజ్జూర్ మండలంలోని ఆయా గ్రామపంచాయతీల పరిధిలో ఉన్న పల్లె ప్రకృతి వనాలపై సంబంధిత అధికారులు, ఎంపీడీఓ, పంచాయతీ శాఖ అధికారులు, జిల్లా యంత్రాంగం ప్రత్యేక దృష్టి సారించి క్షేత్రస్థాయిలో పరిశీలన చేయాలని స్థానికులు డిమాండ్ చేస్తున్నారు.ప్రభుత్వ లక్ష్యానికి అనుగుణంగా పల్లె ప్రకృతి వనాలను అభివృద్ధి చేసి, వాటిని ప్రజలకు ఆహ్లాదాన్ని అందించే ప్రాంతాలుగా మార్చాలే తప్ప మందుబాబులకు అడ్డాలుగా మారకుండా చర్యలు తీసుకోవాలని కోరుతున్నారు.