బలూచిస్తాన్ వేదికగా మహిళలతో ప్రత్యేక పోరాట దళం ఏర్పాటు

సూర్య అంతర్జాతీయ డెస్క్: పాకిస్తాన్‌లోని అశాంత బలూచిస్తాన్ ప్రావిన్సులో దశాబ్దాలుగా కొనసాగుతున్న సాయుధ పోరాటంలో సరికొత్త పరిణామం చోటుచేసుకుంది. పాక్ సైన్యానికి మరియు చైనా-పాకిస్తాన్ ఎకనామిక్ కారిడార్ (సీపీఈసీ) ప్రాజెక్టులకు పెను సవాలు విసురుతూ బలూచిస్తాన్ లిబరేషన్ ఫ్రంట్ (బీఎల్‌ఎఫ్) సరికొత్తగా మహిళా పోరాట యోధులతో కూడిన ప్రత్యేక విభాగాన్ని తెరపైకి తెంది. 'కరిమా ఆర్మ్డ్ అసాల్ట్ డివిజన్' పేరుతో పూర్తిగా మహిళలతో కూడిన ఈ సాయుధ విభాగాన్ని ఆ సంస్థ అధికారికంగా ప్రకటించింది. ఇటీవలే పాకిస్తాన్ భద్రతా బలగాలపై ఈ మహిళా దళం తమ తొలి సాయుధ దాడిని నిర్వహించినట్లు వెలువడిన వీడియోలు ప్రస్తుతం అంతర్జాతీయ వర్గాలలో తీవ్ర కలకలం రేపుతున్నాయి.

టర్బత్ ప్రాంతంలోని జుసాక్ సమీపంలో క్విక్ రియాక్షన్ ఫోర్స్ కాన్వాయ్‌పై సెప్టెంబర్ 22న ఈ మహిళా యోధులు కాల్పులు జరిపినట్లు సమాచారం. సీపీఈసీకి చెందిన కీలక రవాణా మార్గంలోనే ఈ దాడి జరగడం గమనార్హం. అలాగే సెప్టెంబర్ 25న కలాత్ జిల్లా మంగ్చార్ ప్రాంతంలోనూ మరో ఆపరేషన్ చేపట్టారు. రహదారులను దిగ్బంధించి, రవాణా వాహనాలను తనిఖీ చేస్తూ ఈ మహిళా దళం హడలెత్తించింది. ఈ దాడులలో తొమ్మిది మంది పాక్ సైనిక సిబ్బంది మృతి చెందారని బీఎల్‌ఎఫ్ ప్రకటించింది. హక్కుల కార్యకర్తగా ఉండి కెనడాలో మృతి చెందిన కరిమా బలూచ్ పేరు మీదుగా ఈ ప్రత్యేక విభాగానికి నామకరణం చేయడం ద్వారా, రాజకీయ పోరాట వారసత్వాన్ని సాయుధ పోరాటంతో ముడిపెట్టాలని ఆ సంస్థ భావిస్తోంది.

ఈ పరిణామం పాక్ సైన్యాధ్యక్షుడు జనరల్ ఆసిమ్ మునీర్‌కు, ముఖ్యంగా బిలియన్ల డోర్ల విలువైన చైనా ప్రాజెక్టులకు అత్యంత ప్రమాదకరమైన ముప్పుగా మారుతోందని భద్రతా నిపుణులు విశ్లేషిస్తున్నారు. గతంలో బలూచిస్తాన్ లిబరేషన్ ఆర్మీ (బీఎల్‌ఏ) మహిళలను ఆత్మాహుతి దళాలలో ఉపయోగించగా, ఇప్పుడు అత్యంత పురాతనమైన బీఎల్‌ఎఫ్ కూడా మహిళలను ప్రత్యక్ష సాయుధ పోరాటంలోకి దించడం పరిస్థితి తీవ్రతకు అద్దం పడుతోంది. సహజ వనరులతో కళకళలాడుతున్న బలూచిస్తాన్ ప్రాంతంలో దశాబ్దాలుగా జరుగుతున్న ఆర్థిక వివక్ష, వెనుకబాటుతనం మరియు ప్రభుత్వ నిర్లక్ష్యమే ఈ తిరుగుబాటుకు ప్రధాన కారణమని స్థానికులు ఆరోపిస్తున్నారు. ఈ తాజా పరిణామాలు ఇస్లామాబాద్‌తో పాటు బీజింగ్ ప్రభుత్వాలకు కూడా పెద్ద తలనొప్పిగా మారే అవకాశం ఉంది.