హోర్ముజ్ జలసంధిలో ఇరాన్ తీవ్ర హెచ్చరికలు

                                              నిబంధనలు ఉల్లంఘించిన 7 ఆయిల్ ట్యాంకర్లపై ఐఆర్‌జీసీ దాడులు
సూర్య అంతర్జాతీయ డెస్క్: పశ్చిమాసియాలో ఉద్రిక్తతలు మరోసారి తారస్థాయికి చేరాయి. వ్యూహాత్మక సముద్ర వాణిజ్య మార్గమైన హోర్ముజ్ జలసంధిలో నిబంధనలు ఉల్లంఘించి ప్రయాణించాయన్న ఆరోపణలతో గత ఐదు రోజుల్లో కనీసం ఏడు చమురు రవాణా నౌకలను లక్ష్యంగా చేసుకుని దాడులు చేసినట్లు ఇస్లామిక్ రివల్యూషనరీ గార్డ్ కార్ప్స్ నౌకాదళం వెల్లడించింది. ఇరాన్ నిర్దేశించిన నిబంధనలు పాటించకుండా, అనుమతి లేని మార్గాల్లో రాకపోకలు సాగించిన ట్యాంకర్లపైనే ఈ దాడులు నిర్వహించినట్లు అధికార వర్గాలు స్పష్టం చేశాయి.

హోర్ముజ్ జలసంధి అంతర్జాతీయ నౌకాయానానికి పూర్తిగా అందుబాటులో ఉందని, పరిస్థితులు తమ నియంత్రణలోనే ఉన్నాయని అమెరికా పాలక వర్గం చేస్తున్న ప్రకటనలను తోసిపుచ్చుతూ ఇరాన్ ఈ బలప్రదర్శనకు దిగింది. అంతర్జాతీయ సముద్ర రక్షణ పర్యవేక్షణ సంస్థల సమాచారం ప్రకారం శుక్రవారం జలసంధి ప్రవేశ ద్వారం వద్ద ఒకటి, నిష్క్రమణ మార్గం వద్ద మరొకటి చొప్పున రెండు చమురు నౌకలపై పేలుళ్లు సంభవించాయి. అంతకుముందు నాలుగు రోజుల్లో కువైట్, యూఏఈలకు చెందిన పలు వ్యాపార నౌకలపై దాడులు జరిగినట్లు స్వతంత్ర పరిశీలకులు ధ్రువీకరించారు.

తమ అనుమతి లేకుండా లేదా తాము నిర్దేశించిన సురక్షిత మార్గాలను కాదని జలసంధిని దాటేందుకు ప్రయత్నించే ఏ నౌక అయినా క్షిపణి దాడులను లేదా సముద్రపు మందుపాతర్లను ఎదుర్కోవాల్సి ఉంటుందని ఐఆర్‌జీసీ ఉన్నతాధికారులు హెచ్చరించారు. అమెరికా మరియు ఇజ్రాయెల్‌తో నెలకొన్న సైనిక ఉద్రిక్తతల నేపథ్యంలో తమ సముద్ర సరిహద్దులను అతిక్రమించే నౌకలపై నిఘాను మరింత కట్టుదిట్టం చేశామని స్పష్టం చేశారు. ఇంధన మార్గాల రక్షణ పేరుతో విదేశీ శక్తులు చేసే ప్రయత్నాలను ఎట్టిపరిస్థితుల్లోనూ సహించేది లేదని తేల్చిచెప్పారు.

ప్రపంచవ్యాప్తంగా సరఫరా అయ్యే ముడి చమురులో దాదాపు ఇరవై శాతానికి పైగా ప్రయాణించే హోర్ముజ్ జలసంధిలో ఇలాంటి పరిణామాలు చోటుచేసుకోవడం గ్లోబల్ ఎనర్జీ మార్కెట్లను కలవరపెడుతోంది. తాజా దాడుల కారణంగా సముద్ర రవాణా బీమా ఛార్జీలు విపరీతంగా పెరగడంతో పాటు చమురు ధరల్లో తీవ్ర హెచ్చుతగ్గులు నమోదయ్యే ముప్పు పొంచి ఉంది. ప్రధాన చమురు రవాణా మార్గంలో శాంతిభద్రతల పరిరక్షణ కోసం ప్రపంచ దేశాలు దౌత్య మార్గాల్లో జోక్యం చేసుకోవాలని అంతర్జాతీయ షిప్పింగ్ సంస్థలు విజ్ఞప్తి చేస్తున్నాయి.