మద్యం తాగి వాహనం నడిపితే జైలు శిక్ష తప్పదు!

సిద్దిపేట అర్బన్, ;  మద్యం సేవించి వాహనాలు నడిపితే కఠిన చర్యలు తప్పవని సిద్దిపేట ట్రాఫిక్‌ పోలీసులు హెచ్చరిస్తున్నారు. పట్టణ పరిసర ప్రాంతాల్లో నిర్వహించిన వాహన తనిఖీల్లో డ్రంక్‌ అండ్‌ డ్రైవ్‌కు పాల్పడిన 47 మందిని గుర్తించి, న్యాయస్థానంలో హాజరుపరిచారు. విచారణ అనంతరం వారికి మొత్తం రూ.4,66,000 జరిమానా విధించగా, ఎనిమిది మందికి జైలు శిక్ష పడింది. మరోవైపు డ్రైవింగ్‌ లైసెన్స్‌ లేకుండా వాహనాలు నడిపిన 16 మందికి రూ.80,000 జరిమానా విధించారు. ఈ రెండు రకాల ఉల్లంఘనలకు సంబంధించి మొత్తం 63 కేసుల్లో రూ.5,46,000 జరిమానా విధించినట్లు ట్రాఫిక్‌ పోలీసులు వెల్లడించారు.

ఎనిమిది మందికి జైలు శిక్ష

సిద్దిపేట ట్రాఫిక్‌ సీఐ చెట్టుక్రింది ముత్యం రాజు తన సిబ్బందితో కలిసి గత ఐదు రోజులుగా పట్టణ పరిసర ప్రాంతాల్లో వాహన తనిఖీలు నిర్వహించారు. ఈ తనిఖీల్లో మద్యం సేవించి వాహనాలు నడుపుతూ పట్టుబడిన 47 మందిని సిద్దిపేట స్పెషల్‌ సెకండ్‌ క్లాస్‌ జ్యుడీషియల్‌ మేజిస్ట్రేట్‌ కాంతారావు ఎదుట హాజరుపరిచారు. కేసులను విచారించిన న్యాయమూర్తి ఐదుగురికి రెండు రోజుల చొప్పున, ఇద్దరికి ఒక రోజు చొప్పున, మరొకరికి పది రోజుల జైలు శిక్ష విధించారు. అలాగే డ్రంక్‌ అండ్‌ డ్రైవ్‌ కేసుల్లో మొత్తం రూ.4.66 లక్షల జరిమానా విధించారు.

లైసెన్స్‌ లేకున్నా చర్యలు తప్పవు

డ్రైవింగ్‌ లైసెన్స్‌ లేకుండా వాహనాలు నడిపిన 16 మందికి రూ.80 వేల జరిమానా విధించారు. వాహనం నడిపే ప్రతి ఒక్కరూ తప్పనిసరిగా చెల్లుబాటు అయ్యే డ్రైవింగ్‌ లైసెన్స్‌ కలిగి ఉండాలని ట్రాఫిక్‌ పోలీసులు సూచించారు.

రోడ్డు భద్రత ప్రతి ఒక్కరి బాధ్యత

ఈ సందర్భంగా ట్రాఫిక్‌ సీఐ చెట్టుక్రింది ముత్యం రాజు మాట్లాడుతూ.. మద్యం సేవించి వాహనం నడపడం వల్ల వాహనదారుల ప్రాణాలకే కాకుండా ఇతరుల ప్రాణాలకు కూడా ముప్పు వాటిల్లుతుందని తెలిపారు. రోడ్డు ప్రమాదాలను నివారించేందుకు ప్రతి ఒక్కరూ బాధ్యతాయుతంగా వ్యవహరించాలని, ట్రాఫిక్‌ నియమ నిబంధనలను తప్పనిసరిగా పాటించాలని సూచించారు.మద్యం సేవించి వాహనం నడుపుతూ పట్టుబడితే రూ.10,000 జరిమానాతో పాటు జైలు శిక్ష వంటి చట్టపరమైన చర్యలు ఎదుర్కోవాల్సి ఉంటుందని, డ్రైవింగ్‌ లైసెన్స్‌ లేకుండా వాహనం నడిపితే రూ.5,000 జరిమానా విధించే అవకాశం ఉందని హెచ్చరించారు. ప్రజల ప్రాణాల రక్షణే లక్ష్యంగా వాహన తనిఖీలు కొనసాగిస్తామని స్పష్టం చేశారు.