మాజీ డీజీపీ భార్య హత్య కేసులో కీలక పురోగతి.. నలుగురు నేపాలీలు అరెస్ట్

హైదరాబాద్:నగరంలో సంచలనం సృష్టించిన మాజీ డీజీపీ భార్య తనూజ హత్య కేసులో ఎట్టకేలకు పోలీసులకు కీలక విజయం దక్కింది. ఈ కేసులో ప్రధాన నిందితురాలైన నేపాలీ పనిమనిషి కల్పనతో పాటు మరో ముగ్గురు నిందితులను తెలంగాణ స్పెషల్ టీమ్స్ అదుపులోకి తీసుకున్నాయి.

జూబ్లీహిల్స్ ప్రశాసన్ నగర్‌లోని నివాసంలో గత మే 8వ తేదీన తనూజ దారుణ హత్యకు గురయ్యారు. ఇంట్లో ఎవరూ లేని సమయంలో ప్రవేశించిన నిందితులు.. తనూజను హతమార్చి, భారీ ఎత్తున బంగారు ఆభరణాలు, విలువైన వస్తువులతో పరారయ్యారు. ఘటన అనంతరం నిందితులు నేపాల్‌కు పారిపోయినట్లు పోలీసులు గుర్తించారు.

గత ఆరు నెలలుగా నిందితుల కోసం ప్రత్యేక బృందాలతో గాలింపు చర్యలు చేపట్టిన పోలీసులు, పక్కా సమాచారంతో వారిని అదుపులోకి తీసుకుని రహస్య ప్రాంతంలో విచారిస్తున్నారు. నిందితుల నుంచి మరింత సమాచారం రాబట్టి, త్వరలోనే పూర్తి వివరాలను అధికారికంగా వెల్లడించే అవకాశం ఉంది.