జూలూరుపాడును కరువు మండలంగా ప్రకటించాలి

సూర్యజూలూరుపాడు,ఎల్‌నినో ప్రభావంతో నెలకొన్న తీవ్ర వర్షాభావ పరిస్థితుల నేపథ్యంలో జూలూరుపాడు మండలాన్ని కరువు మండలంగా ప్రకటించి రైతాంగాన్ని ఆదుకోవాలని తెలంగాణ రాష్ట్ర రైతు సంఘం భద్రాద్రి కొత్తగూడెం జిల్లా అధ్యక్షుడు చండ్ర నరేంద్రకుమార్ ప్రభుత్వాన్ని డిమాండ్ చేశారు.ఎకరానికి రూ.30 వేల చొప్పున నష్టపరిహారం అందించాలని కోరారు.శుక్రవారం సిరిపురపు వెంకటేశ్వర్లు అధ్యక్షతన నిర్వహించిన సీపీఐ మండల కార్యవర్గ సమావేశంలో ఆయన మాట్లాడారు.రైతులు ఇప్పటికే పంటల సాగుకు వేలాది రూపాయలు పెట్టుబడులు పెట్టారని,వర్షాలు లేక ఆశించిన దిగుబడులు వచ్చే పరిస్థితి లేదని ఆవేదన వ్యక్తం చేశారు.జిల్లాలో లోటు వర్షపాతం నమోదైందని,అనేక మండలాల్లో తీవ్ర వర్షాభావ పరిస్థితులు నెలకొన్నాయని నరేంద్ర కుమార్ తెలిపారు.చెరువులు,కుంటలు ఎండిపోవడంతో భూగర్భ జలమట్టం కనిష్ఠ స్థాయికి పడిపోతోందన్నారు.

గోదావరి జలాలతో చెరువులు నింపాలి

రైతులు సాగు చేసిన పంటలను కాపాడేందుకు ప్రభుత్వం తక్షణమే ప్రత్యామ్నాయ చర్యలు చేపట్టాలని నరేంద్రకుమార్ కోరారు. గోదావరి జలాలను జిల్లాకు అందించే ప్రక్రియను వేగవంతం చేసి,సాధ్యమైనంత మేరకు చెరువులు,కుంటలను నింపాలని డిమాండ్ చేశారు. కరువు పరిహారాన్ని వెంటనే అందించి రైతులకు అండగా నిలవాలన్నారు.పత్తికి కనీస మద్దతు ధరగా క్వింటాకు రూ.13 వేలు చెల్లించాలని కోరారు.ఇతర రాష్ట్రాలు కరువు పరిస్థితులను గుర్తించి రైతులను ఆదుకునేందుకు చర్యలు చేపడుతుండగా..తెలంగాణ ప్రభుత్వం ఆ దిశగా స్పందించడం లేదని చండ్ర విమర్శించారు.ప్రభుత్వం వెంటనే నష్టపరిహారం ప్రకటించి రైతులను ఆదుకోకపోతే పెద్ద ఎత్తున రైతులను సమీకరించి ఆందోళన చేపడతామని హెచ్చరించారు.ఈ సమావేశంలో సీపీఐ మండల కార్యదర్శి గుండెపిన్ని వెంకటేశ్వర్లు,ఎస్‌కే నాగుల్‌మీరా,యల్లంకి మధు,పొన్నెకంటి వెంకటేశ్వర్లు,గుండెపిన్ని మధుసూదన్‌రావు,కంచర్ల రాఘవేంద్రరావు,వల మల్ల సామేలు,హలావత్ బద్రు,కొండ వీరయ్య తదితరులు పాల్గొన్నారు.

సూర్య రిపోర్టర్ సిద్ధిక్ జూలూరుపాడు