హనుమకొండ ఆర్టీసీ డిపోలో ఎన్నికల ప్రచారం

పాల్గొన్న డీసీసీ అధ్యక్షులు ఇనగాల వెంకట్రాం రెడ్డి,  ఎమ్మెల్యే కేఆర్ నాగరాజు

హనుమకొండ టౌన్, అక్టోబర్ 3, మేజర్ న్యూస్ సూర్య,

తెలంగాణ రాష్ట్ర రోడ్డు రవాణా సంస్థ  గుర్తింపు కార్మిక సంఘం ఎన్నికల నేపథ్యంలో ఉమ్మడి వరంగల్ జిల్లా వ్యాప్తంగా కాంగ్రెస్ అనుబంధ కార్మిక సంఘం ప్రచారం ముమ్మరంగా సాగుతుంది. ఇందులో భాగంగా శనివారం హనుమకొండ ఆర్టీసీ డిపో పరిధిలో నిర్వహించిన భారీ ఎన్నికల ప్రచార కార్యక్రమంలో హనుమకొండ జిల్లా కాంగ్రెస్ కమిటీ  అధ్యక్షులు ఇనగాల వెంకట్రాం రెడ్డి, వర్ధన్నపేట ఎమ్మెల్యే కేఆర్ నాగరాజు సంయుక్తంగా పాల్గొని కార్మికులను కలిశారు. ఈ సందర్భంగా వారు ఆర్టీసీ కార్మికులు, సిబ్బందిని వ్యక్తిగతంగా కలిసి కాంగ్రెస్ ప్రభుత్వ హయాంలో కార్మికులకు జరుగుతున్న మేలును, సంస్థ బలోపేతానికి తీసుకుంటున్న చర్యలను వివరించారు. ఆర్టీసీ కార్మికుల శ్రేయస్సుకు, సంస్థ సంక్షేమానికి ఎల్లప్పుడూ కాంగ్రెస్ ప్రభుత్వం కట్టుబడి ఉంటుందని స్పష్టం చేశారు. కార్మికుల న్యాయమైన సమస్యల పరిష్కారానికి నిరంతరం శ్రమించే కాంగ్రెస్ అనుబంధ కార్మిక సంఘాన్ని ఈ ఎన్నికల్లో భారీ మెజారిటీతో గెలిపించాలని కోరారు. హనుమకొండ, వరంగల్ పరిధిలోని అన్ని డిపోల్లోనూ కాంగ్రెస్ అనుబంధ సంఘం ఘన విజయం సాధించడం ఖాయమని ధీమా వ్యక్తం చేశారు. నూతనంగా నియమితులైన డివిజన్ల అధ్యక్షులతో కలిసి క్షేత్రస్థాయిలో ప్రచారాన్ని మరింత ఉధృతం చేస్తామని వారు పేర్కొన్నారు.