గుర్తుతెలియని వాహనం ఢీకొని బైక్‌దారుడు దుర్మరణం
ఇబ్రహీంపల్లి గేట్ వద్ద రోడ్డు ప్రమాదం.
చేవెళ్ల : రెడ్డి జిల్లా చేవెళ్ల పోలీస్‌స్టేషన్‌ పరిధిలో జరిగిన రోడ్డు ప్రమాదంలో ఓ వ్యక్తి మృతి చెందాడు. పోలీసులు తెలిపిన వివరాల ప్రకారం.. చేవెళ్ల మండలం బస్తేపూర్‌ గ్రామానికి చెందిన బేగరి రాఘవేందర్‌ (37) హైదరాబాద్‌లోని హఫీజ్‌పేట్‌లో వంటపని చేసుకుంటూ జీవనం సాగిస్తున్నాడు.
సోమవారం (అక్టోబర్ 12) ఉదయం పనికి వెళ్లిన రాఘవేందర్‌ రాత్రి 8.30 గంటల సమయంలో తన గ్లామర్‌ బైక్‌పై ఇంటికి చేరుకున్నాడు. అనంతరం పాలు తీసుకురావడానికి చేవెళ్ల వైపు బయలుదేరాడు. ఈ క్రమంలో రాత్రి 9 గంటల సమయంలో ఇబ్రహీంపల్లి గేట్ సమీపంలోని చాయ్‌ బంక్‌ వద్ద గుర్తుతెలియని వాహనం వేగంగా వచ్చి అతని బైక్‌ను ఢీకొట్టింది.
ఈ ప్రమాదంలో రాఘవేందర్‌కు తలతో పాటు కుడికాలు, కుడిచేతికి తీవ్ర గాయాలై అక్కడికక్కడే మృతి చెందాడు. ప్రమాదానికి కారణమైన వాహన డ్రైవర్‌ అక్కడి నుంచి పరారయ్యాడు. మృతుడి భార్య బేగరి మహేశ్వరి ఫిర్యాదు మేరకు చేవెళ్ల పోలీసులు కేసు నమోదు చేశారు. ప్రమాదానికి కారణమైన వాహనం, డ్రైవర్‌ను గుర్తించేందుకు దర్యాప్తు చేపట్టారు.
(చేవెళ్ల - మేజర్ న్యూస్)
