ఎలికట్ట అంభభవాని ఆలయంలో ఎమ్మెల్సీ పూజలు....

షాద్‌నగర్ నియోజకవర్గ పరిధిలోని ఫరూఖ్‌నగర్ మండలం ఎలికట్ట గ్రామంలో వెలిసిన ప్రసిద్ధ శ్రీ అంబా భవానీ మాత ఆలయంలో శరన్నవరాత్రి ఉత్సవాలు వైభవంగా ప్రారంభమయ్యాయి. దేవి నవరాత్రుల సందర్భంగా ఎమ్మెల్సీ నాగర్ కుంట నవీన్ రెడ్డి దంపతులు తమ కుటుంబ సభ్యులతో కలిసి ఆదివారం అమ్మవారిని దర్శించుకున్నారు. ఆలయానికి చేరుకున్న ఎమ్మెల్సీ దంపతులకు అర్చకులు, ఆలయ కమిటీ సభ్యులు పూర్ణకుంభంతో ఘన స్వాగతం పలికారు.

 శరన్నవరాత్రి మహోత్సవాలను పురస్కరించుకుని ఆలయంలో కొలువై ఉన్న భవానీ మాతకు వారు ప్రత్యేక అభిషేకాలు, అర్చనలు, కుంకుమార్చనలు నిర్వహించి మొక్కులు తీర్చుకున్నారు. ఈ సందర్భంగా ఎమ్మెల్సీ నవీన్ రెడ్డి విలేకరులతో మాట్లాడుతూ చారిత్రక, ఆధ్యాత్మిక విశిష్టత కలిగిన ఎల్లికట్ట భవానీ మాత క్షేత్రాన్ని దేవి నవరాత్రుల వేళ దర్శించుకోవడం ఎంతో సంతోషాన్ని ఇచ్చిందన్నారు. ఆ జగన్మాత కరుణాకటాక్షాలతో ప్రజలందరికీ మంచి జరగాలని, ప్రతి ఒక్కరి జీవితాల్లో సుఖసంతోషాలు, ఆయురారోగ్యాలు నిండాలని అమ్మవారిని వేడుకున్నట్లు తెలిపారు. ఉత్సవాల సందర్భంగా ఆలయానికి పోటెత్తుతున్న భక్తులకు కమిటీ సభ్యులు కల్పిస్తున్న వసతులు, ఏర్పాట్లను ఆయన అభినందించారు.

ఈ కార్యక్రమంలో ఎల్లికట్ట సర్పంచ్ వాకిటి నవకిరణ్ నర్సింహ, మాజీ సర్పంచ్ సాయి యాదవ్, పోమాల్ పల్లి సర్పంచ్ స్వప్న భూపాల్ రెడ్డి, మాజీ కౌన్సిలర్లు కానుగు అనంతయ్య, పలమకుల చెన్నయ్య, మాజీ సర్పంచ్ నాగర్ కుంట ఉమా ప్రవీణ్ రెడ్డి, అప్పరెడ్డి గూడ మాజీ సర్పంచ్ జెకే నర్సింహా, వెల్జర్ల మాజీ ఎంపిటిసి అశోక్ రెడ్డి, ఆలయ చైర్మన్ చంద్రయ్య, మాజీ చైర్మన్లు, కమిటీ సభ్యులు పాల్గొన్నారు.

రాఘవేందర్ గౌడ్: మేజర్ న్యూస్, షాద్ నగర్