ఆదిలాబాద్ రిమ్స్ ఆసుపత్రి అగ్నిప్రమాదంలో పెరిగిన మరణాలు: ఐదుగురు పసికందుల మృతితో మిన్నంటిన రోదనలు
సూర్య తెలంగాణ డెస్క్: తెలంగాణలోని ఆదిలాబాద్ రాజీవ్ గాంధీ ఇన్స్టిట్యూట్ ఆఫ్ మెడికల్ సైన్సెస్ (రిమ్స్) ప్రభుత్వ బోధనాసుపత్రిలో సంభవించిన ఘోర అగ్నిప్రమాద ఘటనలో మృతుల సంఖ్య ఐదుకు చేరింది. ప్రత్యేక నవజాత శిశు సంరక్షణ విభాగంలో (ఎస్ఎన్సీయూ) ఎయిర్ కండీషనర్ పేలి చెలరేగిన మంటలు, దట్టమైన పొగ కారణంగా ఊపిరాడక అస్వస్థతకు గురైన పసికందుల్లో చికిత్స పొందుతూ మరో ఇద్దరు ప్రాణాలు విడిచారు. దీంతో ఈ దుర్ఘటనలో మరణించిన పసికందుల సంఖ్య ఐదుకు పెరిగినట్లు వైద్య ఆరోగ్య శాఖ అధికారులు ధ్రువీకరించారు. మరో ఇద్దరు నవజాత శిశువుల ఆరోగ్య పరిస్థితి ప్రస్తుతం విషమంగా ఉన్నట్లు సమాచారం అందుతోంది.
ఆసుపత్రి వర్గాలు వెల్లడించిన వివరాల ప్రకారం, ఇంద్రవెల్లి మండలం దుబ్బగూడకు చెందిన నాగుబాయి శిశువును నిర్మల్ ఆసుపత్రికి తరలిస్తుండగా మార్గమధ్యంలో కన్నుమూయగా, లింగాపూర్ మండలానికి చెందిన దుర్గాబాయి శిశువు రిమ్స్లో చికిత్స పొందుతూ తుదిశ్వాస విడిచింది. అంతకుముందే ముగ్గురు నెలలు నిండకుండా జన్మించిన పసికందులు విషవాయువులు పీల్చి ఊపిరాడక ప్రాణాలు కోల్పోయారు. ప్రమాద సమయంలో సుమారు 25 మందికి పైగా శిశువులు ఇంక్యుబేటర్లలో చికిత్స పొందుతుండగా, అప్రమత్తమైన భద్రతా సిబ్బంది, అంబులెన్స్ డ్రైవర్లు, ఆసుపత్రి సిబ్బంది దాదాపు 20 మందికి పైగా చిన్నారులను సురక్షితంగా బయటకు తీసుకొచ్చి సమీపంలోని ఇతర ఆసుపత్రులకు తరలించారు.
ఈ విషాద ఘటనపై ముఖ్యమంత్రి ఎనుముల రేవంత్ రెడ్డి తీవ్ర దిగ్భ్రాంతి వ్యక్తం చేసి సమగ్ర విచారణకు ఆదేశించారు. వైద్య ఆరోగ్య శాఖ మంత్రి దామోదర రాజనర్సింహ రిమ్స్ ఆసుపత్రిని క్షేత్రస్థాయిలో సందర్శించి ఎస్ఎన్సీయూ విభాగాన్ని పరిశీలించడంతో పాటు బాధిత కుటుంబాలను పరామర్శించారు. ఏసీల నిర్వహణ లోపం, నిధుల కొరత, భద్రతా ప్రమాణాల వైఫల్యాలపై నిజాలు నిగ్గుతేల్చేందుకు ఐదుగురు సభ్యులతో కూడిన ప్రత్యేక విచారణ కమిటీని ఏర్పాటు చేసినట్లు ఆయన ప్రకటించారు. ఆసుపత్రిలో ఎలక్ట్రికల్, ఫైర్ సేఫ్టీ, స్ట్రక్చరల్ ఆడిట్లు నిర్వహించాలని ఆదేశించామని, బాధ్యులపై కఠిన చట్టపరమైన చర్యలు తప్పవని మంత్రి స్పష్టం చేశారు. పసికందులను కోల్పోయిన తల్లిదండ్రుల రోదనలతో ఆసుపత్రి ప్రాంగణం తీవ్ర విషాదంలో మునిగిపోయింది.
