మిజోరంలో అస్సాం రెజిమెంట్ జవాన్ హత్య కేసు: మహిళ సహా ఆరుగురు నిందితుల అరెస్ట్, జ్యుడీషియల్ కస్టడీకి తరలింపు
సూర్య జాతీయ డెస్క్: సెలవుపై సొంత గ్రామానికి తిరిగి వస్తున్న భారత ఆర్మీకి చెందిన అస్సాం రెజిమెంట్ జవాన్ జకారియా లాల్హ్రియట్లువాంగా (29) దారుణ హత్యకు గురైన కేసులో మిజోరం పోలీసులు కీలక పురోగతి సాధించారు. కొలాసిబ్ జిల్లా బ్వాల్పుయి గ్రామ సమీపంలో జరిగిన రోడ్ రేజ్ వివాదంలో జవాన్ను కొట్టి చంపిన ఆరోపణలపై ఒక మహిళ సహా ఆరుగురు నిందితులను అరెస్ట్ చేసి కొలాసిబ్ జిల్లా జైలుకు తరలించినట్లు అధికారులు వెల్లడించారు. వీరితో పాటు ఈ దాడిలో ప్రమేయం ఉన్న మరో ఇద్దరు మైనర్లను అదుపులోకి తీసుకుని జువైనల్ జస్టిస్ బోర్డు ముందు హాజరుపరిచినట్లు పోలీసులు ధ్రువీకరించారు.
జమ్మూ కాశ్మీర్లో విధులు నిర్వహిస్తున్న జకారియా లాల్హ్రియట్లువాంగా సెలవులపై తన స్వస్థలమైన న్యూ బుయిలుమ్ గ్రామానికి బయలుదేరారు. ఐజ్వాల్ సమీపంలోని లెంగ్పుయి విమానాశ్రయం నుంచి స్నేహితుడికి చెందిన ట్రక్కులో ప్రయాణిస్తుండగా 306వ నెంబరు జాతీయ రహదారిపై కాఫీ బోర్డు ప్లాంటేషన్ సమీపంలో రహదారి సరిగా లేకపోవడంతో ఎదురుగా వస్తున్న వాహనంతో మార్గం ఇవ్వడంపై తీవ్ర వాగ్వాదం చెలరేగింది. ఈ క్రమంలో మద్యం మత్తులో ఉన్న కొందరు స్థానిక యువకులు ట్రక్కు డ్రైవర్పై భౌతిక దాడికి దిగారు. గొడవను ఆపి తన స్నేహితుడిని కాపాడేందుకు ప్రయత్నించిన జవాన్ జకారియాపై నిందితులు తీవ్రంగా దాడి చేసి చితకబాదడంతో ఆయన అక్కడికక్కడే ప్రాణాలు కోల్పోయారు.
ఈ దాడికి పాల్పడిన కావ్న్పుయి పట్టణంలోని హ్మార్ వెంగ్కు చెందిన జోరెంథాంగి అనే మహిళతో పాటు ఇమ్మాన్యుయేల్ లాల్ఛన్హిమా, లాల్హుండికా, లాల్నున్ఫిమా, డేవిడ్ రెమ్రుట్పుయా, మాల్సావ్మ్ట్లువాంగా అనే నిందితులను పోలీసులు అదుపులోకి తీసుకున్నారు. వీరిపై భారతీయ న్యాయ సంహిత (బీఎన్ఎస్) సెక్షన్లు 103(1), 115, 3(6)లతో పాటు రాష్ట్ర మద్యపాన నిషేధ చట్టం కింద కేసులు నమోదు చేశారు. అనంతరం జవాన్ మృతదేహానికి పోస్ట్మార్టం నిర్వహించి సైనిక లాంఛనాలతో అంత్యక్రియలు పూర్తి చేశారు. వృద్ధాప్యంలో ఉన్న తల్లిదండ్రులకు ఆసరాగా నిలుస్తున్న ఏకైక ఆధారమైన జవాన్ను పొట్టనబెట్టుకున్న నిందితులకు కఠిన శిక్ష పడేలా సమగ్ర దర్యాప్తు జరుపుతున్నామని పోలీస్ అధికారులు స్పష్టం చేశారు.
