telanagana
భూగర్భ జలాల పెంపునకు బోర్‌వెల్ రీచార్జ్ నిర్మాణాలు దోహదం:డీపీఓ జయసుధ
నవాబుపేట, మేజర్ న్యూస్,: భూగర్భ జలాలను పెంపొందించడంతో పాటు వర్షపు నీటిని సమర్థవంతంగా ఒడిసిపట్టేందుకు చేపట్టిన బోర్‌వెల్ రీచార్జ్ నిర్మాణాలు, సోక్ పిట్స్‌ను డీపీఓ జయసుధ శుక్రవారం నవాబుపేట మండల కేంద్రంలో సందర్శించి పరిశీలించారు.ఈ సందర్భంగా గ్రామంలో ఏర్పాటు చేసిన బోర్‌వెల్ రీచార్జ్ నిర్మాణాలు, సోక్ పిట్స్ పనితీరును ఆమె క్షేత్రస్థాయిలో పరిశీలించారు. వర్షపు నీటిని వృథా కాకుండా భూమిలోకి ఇంకేలా చర్యలు చేపట్టడం ద్వారా భూగర్భ జలమట్టాలను పెంచేందుకు అవకాశం ఉంటుందని తెలిపారు. అదేవిధంగా సోక్ పిట్స్ ద్వారా మురుగునీటి నిర్వహణ మెరుగుపడటంతో పాటు పరిసరాల పరిశుభ్రతను కాపాడుకోవచ్చని సూచించారు.గ్రామాల్లో నీటి సంరక్షణకు ప్రాధాన్యతనిస్తూ, చేపట్టిన నిర్మాణాలు సమర్థవంతంగా పనిచేసేలా సంబంధిత అధికారులు పర్యవేక్షించాలని సూచించారు. నీటి వనరులను పరిరక్షించడం, వర్షపు నీటిని ఒడిసిపట్టడం ప్రతి ఒక్కరి బాధ్యతగా గుర్తించాలని పేర్కొన్నారు.ఈ కార్యక్రమంలో నవాబుపేట సర్పంచ్ నరసింహారెడ్డి, ఎంపీడీవో అనురాధ, ఎంపీఓ విజయకుమార్, పంచాయతీ కార్యదర్శి నవనీత, ఫీల్డ్ అసిస్టెంట్ సతీష్, గ్రామస్తులు తదితరులు పాల్గొన్నారు.
