అష్టోత్తర శత సుహాసిని పూజ
*పూజా కార్యక్రమంలో పాల్గొన్న సత్తుపల్లి ఎమ్మెల్యే డా. మట్టా రాగమయి దయానంద్*
సత్తుపల్లి మేజర్ సూర్య న్యూస్:
(కిరణ్ కుమార్ ఆరిక)
సత్తుపల్లి మండలం తాళ్లమడ పెద్ద వంతెన వద్దనున్న శ్రీ రాజశ్యామల యాగశాలలో మూల నక్షత్రాన్ని పురస్కరించుకొని శుక్రవారం అష్టోత్తర శత సువాసినీ పూజను భక్తిశ్రద్ధలతో నిర్వహించారు. రాజశ్యామల యాగం, నవదుర్గా సహిత వనదుర్గా మహాయాగంలో భాగంగా నిర్వహించిన ఈ విశేష పూజా కార్యక్రమంలో సత్తుపల్లి నియోజకవర్గ శాసనసభ్యురాలు డా. మట్టా రాగమయి దయానంద్ పాల్గొన్నారు.
ఈ సందర్భంగా యాగశాలలో కొలువుదీరిన అమ్మవారిని ఎమ్మెల్యే దర్శించుకొని ప్రత్యేక పూజల్లో పాల్గొన్నారు. యాగ నిర్వాహకులు బ్రహ్మశ్రీ పెరాల సుబ్రహ్మణ్య శాస్త్రి ఆధ్వర్యంలో వేదమంత్రోచ్ఛారణల నడుమ పూజా కార్యక్రమాలను ఘనంగా నిర్వహించారు. మూల నక్షత్రం సందర్భంగా అమ్మవారి సన్నిధిలో నిర్వహించిన ఈ ఆధ్యాత్మిక కార్యక్రమం భక్తిభావాన్ని వెల్లివిరిసేలా సాగింది.
రాజశ్యామల యాగం, నవదుర్గా సహిత వనదుర్గా మహాయాగంలో భాగంగా నిర్వహిస్తున్న పూజా కార్యక్రమాల్లో భక్తులు పాల్గొని అమ్మవారి కృపాకటాక్షాలు పొందారు.
