ఢిల్లీ వాయు కాలుష్యంపై సుప్రీంకోర్టు ఆగ్రహం
సూర్య న్యూఢిల్లీ డెస్క్: దేశ రాజధాని ఢిల్లీ-ఎన్‌సీఆర్ పరిధిలో రోజురోజుకూ క్షీణిస్తున్న గాలి నాణ్యతపై భారత సర్వోన్నత న్యాయస్థానం తీవ్ర ఆందోళన వ్యక్తం చేసింది. వాయు కాలుష్యానికి పంట వ్యర్థాల దహనం మాత్రమే కాకుండా, రోడ్లపై నిరంతరం తిరిగే వాహనాల నుంచి వెలువడే ఉద్గారాలే అత్యంత ప్రధాన కారణమని సుప్రీంకోర్టు స్పష్టం చేసింది. ఇప్పటికే గాలి నాణ్యత సూచీ (AQI) 400 మార్కును తాకుతోందని, ఊహాజనిత లక్ష్యాల గురించి కాకుండా కాలుష్య స్థాయిలను తక్షణమే తగ్గించే ఆచరణాత్మక చర్యలపై దృష్టి సారించాలని ప్రభుత్వ యంత్రాంగానికి తేల్చిచెప్పింది.
భారీ ట్రాఫిక్, వాహనాల కాలుష్యమే పెను సవాలు
ఢిల్లీని ఎన్‌సీఆర్ పరిధిలోని ఘజియాబాద్, నోయిడా, గురుగ్రామ్, ఫరీదాబాద్ వంటి నగరాలతో కలిపే రహదారులపై వాహనాల రద్దీ విపరీతంగా పెరిగిపోయిందని ప్రధాన న్యాయమూర్తి నేతృత్వంలోని ధర్మాసనం వ్యాఖ్యానించింది. బంపర్-టు-బంపర్ ట్రాఫిక్ కారణంగా నిరంతరం వెలువడే పొగ వాతావరణాన్ని విషతుల్యం చేస్తోందని న్యాయస్థానం పేర్కొంది. దేశంలోని వివిధ ప్రాంతాల నుంచి రోజూ వేలాది వాహనాలు కొద్ది గంటల పాటే ఢిల్లీలోకి ప్రవేశించినప్పటికీ, అవి కలిగించే నష్టం తీవ్రంగా ఉంటోందని ధర్మాసనం అసహనం వ్యక్తం చేసింది. కేవలం ఆంక్షలు విధించినంత మాత్రాన ఫలితం ఉండదని, ప్రజల ప్రవర్తనలో మార్పుతో పాటు శాశ్వత ప్రత్యామ్నాయ రవాణా పరిష్కారాలు అవసరమని కోర్టు సూచించింది.
బాధపడేది పేదలే.. రైతులపై నెపం మోపలేం
కాలుష్య ప్రభావాన్ని విశ్లేషిస్తూ ధర్మాసనం కీలక వ్యాఖ్యలు చేసింది. రోడ్లపై జీవించే రోజువారీ కూలీలు, పేద ప్రజలు ఎలాంటి కాలుష్యాన్ని సృష్టించకపోయినా దాని బారినపడి తీవ్రంగా నష్టపోతున్నారని ఆవేదన వ్యక్తం చేసింది. అలాగే పంట వ్యర్థాలను తగులబెట్టే రైతులపై కేవలం చర్యలు తీసుకోవడమే కాకుండా, వ్యర్థాల నిర్వహణకు అవసరమైన యంత్రాలు, ప్రత్యామ్నాయ పద్ధతులు మరియు ఆర్థిక ప్రయోజనాలపై వారికి అవగాహన కల్పించాలని ప్రభుత్వాన్ని ఆదేశించింది. వాయు కాలుష్య నియంత్రణపై తక్షణ, స్వల్పకాలిక మరియు దీర్ఘకాలిక ప్రణాళికలను అమలు చేయాలని స్పష్టం చేస్తూ తదుపరి విచారణను ధర్మాసనం వాయిదా వేసింది.
