లైబ్రరీ పుస్తకాల కుంభకోణంపై హైకోర్టు ముందస్తు హెచ్చరిక

సూర్య స్పెషల్ డెస్క్: తమిళనాడులో పబ్లిక్ లైబ్రరీలకు పుస్తకాల కొనుగోలు ప్రక్రియలో చోటుచేసుకున్న తీవ్ర అవకతవకలు, కుంభకోణం వ్యవహారంపై మద్రాస్ హైకోర్టు మదురై బెంచ్ దాదాపు రెండేళ్ల క్రితమే (2024 జూలైలో) తీవ్ర హెచ్చరికలు జారీ చేసింది. ప్రభుత్వ నిబంధనలను బాహాటంగా ఉల్లంఘిస్తూ సాగుతున్న ఈ అక్రమ సేకరణ ప్రక్రియ 'కుంభకోణం కంటే తక్కువేమీ కాదు' అని ఘాటుగా వ్యాఖ్యానించిన న్యాయస్థానం, దీనిపై సమగ్ర విచారణ జరిపేందుకు ఉన్నత స్థాయి కమిటీని ఏర్పాటు చేయాలని నాడే ప్రభుత్వాన్ని ఆదేశించింది. ఇటీవల కొయంబత్తూరులోని 'పెరియార్ అరివులగం' నాలెడ్జ్ సెంటర్‌కు పుస్తకాల సేకరణలో అవినీతి జరిగిందంటూ ప్రముఖ రచయిత పెరుమాళ్ మురుగన్ బయటపెట్టడం, రాజకీయ వర్గాల్లో తీవ్ర దుమారం రేపిన నేపథ్యంలో నాటి హైకోర్టు ఆదేశాలు మరోసారి చర్చనీయాంశంగా మారాయి.

నిబంధనలకు తూట్లు.. జాతీయం చేసిన పుస్తకాలతో మోసం
ప్రజా గ్రంథాలయాల నిబంధనల ప్రకారం, ఒకసారి లైబ్రరీల కోసం కొనుగోలు చేసిన పుస్తకాన్ని తదుపరి ఐదేళ్ల వరకు తిరిగి సేకరించకూడదు. అయితే ప్రచురణకర్తలు, కొందరు అధికారులు కుమ్మక్కై ఈ నిబంధనను యథేచ్ఛగా ఉల్లంఘించినట్లు హైకోర్టు గుర్తించింది. కాపీరైట్ గడువు ముగిసిన పుస్తకాలు, ప్రభుత్వం జాతీయం చేసిన ప్రముఖ ప్రాచీన రచయితలైన కల్కి, తిరు వి.కళ్యాణసుందరం (తిరు వి క), నా.పార్థసారథి, ఎ.స. జ్ఞానసంబంధన్ రచనలను లక్ష్యంగా చేసుకుని ఈ మోసానికి పాల్పడ్డారని పిటిషనర్ కోర్టు దృష్టికి తీసుకువచ్చారు. రచయితల వారసులు కాపీరైట్ ఉల్లంఘనలపై ఫిర్యాదు చేసే అవకాశం లేకపోవడంతో, ఆయా పుస్తకాలకు కొత్త పేర్లు, నకిలీ ముఖచిత్రాలు, రచయితల పేర్లు మార్చి సరికొత్త పుస్తకాలుగా చూపించి ఏటా నిధులు కొల్లగొట్టారని ధర్మాసనం ఆగ్రహం వ్యక్తం చేసింది.

కల్కి చారిత్రక నవల పేరు మార్చి ప్రచురణ
ఇందుకు ప్రత్యక్ష ఉదాహరణగా.. కల్కి రచించిన ప్రఖ్యాత చారిత్రక నవల 'శివకామియిన్ శపథం'ను 2013లో 'వీరం విళైంద వరలాట్రు పుదినంగళ్ పార్ట్-1' అనే సరికొత్త పేరుతో ముద్రించి లైబ్రరీలకు విక్రయించిన విషయాన్ని న్యాయస్థానం తన ఉత్తర్వుల్లో ప్రత్యేకంగా ప్రస్తావించింది. పాత క్లాసిక్ రచనలను రీ-ప్యాకేజ్ చేసి, రీ-ప్రింట్ చేస్తూ ప్రభుత్వ ఖజానాకు గండికొట్టేలా సాగుతున్న ఈ అక్రమ కొనుగోళ్ల నెట్‌వర్క్ పట్ల న్యాయమూర్తి తీవ్ర ఆందోళన వ్యక్తం చేశారు.

పారదర్శక విధానం.. విచారణకు ఆదేశం
ఈ వ్యవహారంపై సమగ్ర విచారణ చేపట్టాలని ఉన్నత విద్యాశాఖ కార్యదర్శిని ఆదేశించిన మద్రాస్ హైకోర్టు, గత కొన్నేళ్లుగా జరిగిన పుస్తకాల కొనుగోళ్లపై నిగ్గు తేల్చాలని స్పష్టం చేసింది. భవిష్యత్తులో ఇలాంటి అక్రమాలకు తావులేకుండా పబ్లిక్ లైబ్రరీల కోసం పారదర్శకమైన, ఆన్‌లైన్ ఆధారిత ప్రొక్యూర్మెంట్ విధానాన్ని తీసుకురావాలని ఆదేశించింది. నాటి హైకోర్టు ఆదేశాలు, పరిశీలనలు సరిగ్గా అమలై ఉంటే ప్రస్తుత వివాదాలకు ఆస్కారం ఉండేది కాదని సాహిత్య, పౌర సంఘాలు ఇప్పుడు గుర్తుచేస్తున్నాయి.