national
సొంత పార్టీ ఎమ్మెల్యేల వివాదాలపై సీఎం విజయ్ సీరియస్
చెన్నై: తమిళగ వెట్రి కజగం (టీవీకే) పార్టీకి చెందిన పలువురు ఎమ్మెల్యేలు వరుస వివాదాల్లో చిక్కుకోవడంపై తమిళనాడు ముఖ్యమంత్రి సి. జోసెఫ్ విజయ్ తీవ్ర ఆగ్రహం వ్యక్తం చేశారు. ప్రజా సమస్యలపై వినతిపత్రం ఇవ్వడానికి వచ్చిన పౌరుడిపై అసెంబ్లీ డిప్యూటీ స్పీకర్, ఎమ్మెల్యే ఎం. రవిశంకర్ దాడి చేసిన ఘటన సోషల్ మీడియాలో వైరల్ కావడం, దానికి తోడు గత ఆరు నెలల్లో ప్రజాప్రతినిధులపై వరుస ఆరోపణలు రావడంపై పార్టీ అధినాయకత్వం తీవ్రంగా స్పందించింది.
ఈ పరిణామాల నేపథ్యంలో ముఖ్యమంత్రి విజయ్ మంత్రులు, శాసనసభ్యులతో అత్యవసర సమావేశాన్ని ఏర్పాటు చేశారు. చెన్నై సమీపంలోని మహాబలిపురంలో ఉన్న ఇంటర్‌కాంటినెంటల్ రిసార్ట్‌కు టీవీకే మంత్రులు, ఎమ్మెల్యేలు ఒక్కొక్కరిగా చేరుకుంటున్నారు. ప్రజాప్రతినిధుల ప్రవర్తనా నియమావళి, నియోజకవర్గాల్లో పౌరులతో మసలుకోవాల్సిన తీరుపై సీఎం విజయ్ ఈ సమావేశంలో నేతలకు గట్టి హెచ్చరికలు జారీ చేసే అవకాశం ఉందని పార్టీ వర్గాలు వెల్లడించాయి.
