national
విమానంలో హైజాక్ బెదిరింపు లేఖ
కోల్‌కతా: కోల్‌కతాలోని నేతాజీ సుభాష్ చంద్రబోస్ అంతర్జాతీయ విమానాశ్రయం నుంచి ముంబై బయలుదేరాల్సిన ఎయిర్ ఇండియా విమానంలో హైజాక్ బెదిరింపు నోట్ లభించడం తీవ్ర కలకలం రేపింది. విమానం టేకాఫ్‌కు సిద్ధమవుతున్న సమయంలో క్యాబిన్ సిబ్బందికి బెదిరింపు లేఖ కనిపించడంతో వారు వెంటనే విమానాశ్రయ భద్రతాధికారులకు సమాచారం అందించారు.
సమాచారం అందుకున్న సిఐఎస్ఎఫ్ (CISF), విమానాశ్రయ భద్రతా బలగాలు వెంటనే స్పందించి ప్రయాణికులందరినీ సురక్షితంగా కిందకు దించి టెర్మినల్ భవనానికి తరలించారు. అనంతరం విమానాన్ని ఐసోలేషన్ బేకు తరలించి, బాంబ్ డిస్పోజల్ స్క్వాడ్ మరియు స్నిఫర్ డాగ్స్ సహాయంతో క్షుణ్ణంగా సోదాలు చేపట్టారు.
ఈ ఆకస్మిక ఘటనతో కోల్‌కతా విమానాశ్రయంలో భద్రతను అత్యున్నత స్థాయికి పెంచారు. లేఖను ఎవరు రాశారు, విమానంలోకి ఎలా వచ్చింది అనే కోణంలో పోలీసులు, నిఘా వర్గాలు లోతుగా విచారణ జరుపుతున్నాయి.
