సోమ్నాథ్, మోధేరా దేవాలయాలు భారతీయ సాంస్కృతిక పట్టుదలకు ప్రతీకలు
'మన్ కీ బాత్'లో ప్రధాని మోదీ
సూర్య జాతీయ డెస్క్: భారతదేశ చారిత్రక ధైర్యం, సాంస్కృతిక వారసత్వం మరియు ప్రాచీన సంప్రదాయాలను కాపాడుకోవడంలో దేశం చూపుతున్న పట్టుదలను ప్రధాని నరేంద్ర మోదీ కొనియాడారు. తన నెలవారీ రేడియో కార్యక్రమం ‘మన్ కీ బాత్’ 138వ భాగంలో ప్రసంగించిన ఆయన, గుజరాత్లోని సోమ్నాథ్ ఆలయం, మోధేరా సూర్య దేవాలయాల చరిత్రను సవివరంగా ప్రస్తావించారు.
ఈ సంవత్సరం 'సోమ్నాథ్ స్వాభిమాన్ పర్వ్'తో ప్రారంభమైందని గుర్తుచేసిన ప్రధాని, క్రీ.శ. 1026లో మహమూద్ గజినీ సోమ్నాథ్ ఆలయాన్ని మొదటిసారి ధ్వంసం చేశాడని చెప్పారు. "సోమ్నాథ్ను ధ్వంసం చేసి, భారతదేశ గుర్తింపును తుడిచిపెట్టాలని చూసిన విదేశీ ఆక్రమణదారుల ఆచూకీ నేడు ఎక్కడా లేదు. కానీ, సోమ్నాథ్ ఆలయం నేడు మహా సముద్ర తీరాన అత్యంత వైభవంగా నిలబడి భారతావనికి ఆశీస్సులు అందిస్తోంది" అని మోదీ వ్యాఖ్యానించారు.
1026లోనే మోధేరా సూర్య దేవాలయంపై దాడి
అదే సంవత్సరంలో గుజరాత్లోని ప్రసిద్ధ మోధేరా సూర్య దేవాలయంపై కూడా దాడి జరిగిందని ప్రధాని తెలిపారు. మొదటి భీమ్దేవ్ మహారాజు పాలనలో 1025లో నిర్మించిన ఈ ఆలయాన్ని, నిర్మించిన మరుసటి ఏడాదే దండయాత్రలకు గురిచేశారన్నారు. ఒకే సమయంలో ప్రధాన విశ్వాస కేంద్రాలపై దాడులు జరగడం ఏ సమాజ మనోధైర్యాన్నైనా దెబ్బతీస్తుందని, అయితే రాజా భీమ్దేవ్ గజినీ మూకలను ధీటుగా ఎదుర్కొని స్వల్ప వ్యవధిలోనే మోధేరా ఆలయాన్ని పునర్నిర్మించారని తెలిపారు. ఆ చారిత్రక నిబద్ధతే సోమ్నాథ్ ఆలయం ఎన్నిసార్లు ధ్వంసమైనా మళ్లీ మళ్లీ పునర్నిర్మాణం పొందడానికి కారణమైందన్నారు.
దేశంలోనే తొలి 'సూర్య గ్రామం'గా మోధేరా
కాలక్రమంలో అలావుద్దీన్ ఖిల్జీ పాలనలో కూడా మోధేరా ఆలయం దాడులకు గురైందని, అయినప్పటికీ భారతీయులకు సూర్యుడితో ఉన్న అనుబంధం కేవలం శిల్పకళ, ఆలయాలకే పరిమితం కాలేదని మోదీ పేర్కొన్నారు. సూర్య ఆరాధన అంటే కాంతి, శక్తి, విజ్ఞానం మరియు నిరంతర పురోగతికి ప్రతీక అని తెలిపారు. నేడు మోధేరా గ్రామం పూర్తిస్థాయిలో సౌరశక్తితో నడిచే భారతదేశపు తొలి 'సూర్య గ్రామం' (Solar Village)గా రూపాంతరం చెందిందని, పునరుత్పాదక ఇంధన వినియోగంలో దేశానికే ఆదర్శంగా నిలిచిందని ప్రశంసించారు. ప్రతి ఒక్కరూ మోధేరాను సందర్శించి ఈ వైభవ వారసత్వాన్ని వీక్షించాలని కోరారు.
తమిళనాడులోని తిరుచిరాపల్లి మణప్పారై ప్రాంతంలో తమిళ అధ్యయన విభాగానికి చెందిన ఎ. సెల్వరాజు అనే వ్యక్తి ప్రాచీన శిల్పాలు, ఆలయాలను వెలికితీయడానికి చేస్తున్న కృషిని మోదీ ఈ సందర్భంగా అభినందించారు. స్థానిక చరిత్ర, సంస్కృతిని తెలుసుకునేందుకు ఇలాంటి క్షేత్రస్థాయి పరిశోధనలు ఎంతో తోడ్పడతాయని సూచించారు.
