కేరళలో ఉద్యోగార్థుల నిరసనలు: షాకింగ్ ఫొటోలు బయటపెట్టిన జీవీఎల్

సూర్య నేషనల్ బ్యూరో, న్యూఢిల్లీ: కేరళలో ప్రభుత్వ ఉద్యోగాల భర్తీ, నిరుద్యోగ సమస్యలపై యువత చేపట్టిన నిరసనలపై బీజేపీ జాతీయ నేత, మాజీ ఎంపీ జీవీఎల్ నరసింహారావు తీవ్ర ఆందోళన వ్యక్తం చేశారు. దేశ రాజధాని న్యూఢిల్లీలో ఏర్పాటు చేసిన మీడియా సమావేశంలో ఆయన మాట్లాడుతూ.. కేరళలో చోటుచేసుకున్న నిరసనల తీవ్రతను తెలియజేసే కొన్ని షాకింగ్ ఫొటోలు, దృశ్యాలను బహిర్గతం చేశారు.

మీడియా ఎదుట నిరసన దృశ్యాల ప్రదర్శన:
కేరళలో ఉద్యోగార్థులు చేపట్టిన నిరసనల తీరు తీవ్ర కలవరం కలిగిస్తోందని జీవీఎల్ పేర్కొన్నారు. "కేరళలో యువ ఉద్యోగార్థులు చేపట్టిన నిరసనకు సంబంధించిన అత్యంత విస్మయం కలిగించే కొన్ని ఛాయాచిత్రాలను నేను మీ ముందుంచుతున్నాను. ఇవి చాలా దిగ్భ్రాంతికరమైన దృశ్యాలు. వలర్మతి అనే మహిళా ఉద్యమకారిణి బహిరంగంగా, అందరి సమక్షంలో చేపట్టిన నిరసన రూపం సమాజం తలదించుకునేలా ఉంది" అని ఆయన వ్యాఖ్యానించారు. నిరుద్యోగుల సమస్యలను పరిష్కరించడంలో లెఫ్ట్ డెమోక్రటిక్ ఫ్రంట్ (LDF) ప్రభుత్వం ఘోరంగా విఫలమైందని ఆరోపించారు.

కేరళ పినరయి సర్కార్‌పై విమర్శల దాడి:
రాష్ట్రంలో నిరుద్యోగం తారాస్థాయికి చేరడంతో విద్యావంతులైన యువత రోడ్లెక్కి తీవ్ర నిరాశానిస్పృహలతో తీవ్రమైన చర్యలకు పాల్పడుతున్నారని జీవీఎల్ మండిపడ్డారు. పినరయి విజయన్ నేతృత్వంలోని కమ్యూనిస్ట్ ప్రభుత్వం అధికార దుర్వినియోగానికి పాల్పడుతూ నిరుద్యోగ యువత భవిష్యత్తును అంధకారంలోకి నెట్టిందని దుయ్యబట్టారు. అర్హులైన నిరుద్యోగులకు న్యాయం చేయకపోగా, వారి ఆందోళనలను పెడచెవిన పెడుతోందని విమర్శించారు.