ఎరువుల కొరతతో రేపటి రోజున ఆహార సంక్షోభం తప్పదని హెచ్చరిక

సూర్య జాతీయ డెస్క్: ప్రపంచ వ్యాప్తంగా జరుగుతున్న వివిధ ఘర్షణల వల్ల తలెత్తుతున్న ఆహార, ఇంధన మరియు ఎరువుల సంక్షోభాల కారణంగా గ్లోబల్ సౌత్ దేశాలు అత్యంత తీవ్రంగా నష్టపోతున్నాయని కేంద్ర వాణిజ్య, పరిశ్రమల శాఖ మంత్రి పీయూష్ గోయల్ స్పష్టం చేశారు. అమెరికా అధ్యక్షతన విస్కాన్సిన్ రాష్ట్రంలోని మిల్వాకీ నగరంలో ప్రారంభమైన జీ20 వాణిజ్య మంత్రుల సదస్సులో ఆయన పాల్గొని ప్రసంగించారు. ప్రస్తుత ఎరువుల కొరత భవిష్యత్తులో పెద్ద ఎత్తున ఆహార సంక్షోభానికి దారితీసే అవకాశం ఉందని ఆయన తీవ్ర ఆందోళన వ్యక్తం చేశారు. కోవిడ్ మహమ్మారి కాలంలో భారత్ తన దేశంలోని 140 కోట్లకు పైగా ప్రజలకే కాకుండా, అవసరమైన అనేక ఇతర దేశాలకు కూడా ఆహార భద్రతను భరోసాగా నిలిపిందని గుర్తుచేశారు.

ఆహార భద్రతపై జరిగిన ప్రత్యేక సదస్సులో మాట్లాడిన పీయూష్ గోయల్, ఏ దేశంపై కూడా ఆహారాన్ని ఒక ఒత్తిడి ఆయుధంగా ఉపయోగించకూడదని తేల్చిచెప్పారు. ప్రతి ఒక్కరికీ ఆహార భద్రత కల్పించడం, రైతన్నలకు మెరుగైన అవకాశాలను సృష్టించడం తమ విధానంలో అత్యంత కీలకమైన భాగమని ఆయన పునరుద్ఘాటించారు. రైతులకు న్యాయమైన అవకాశాలు కల్పించడంతో పాటు అంచనా వేయదగిన ప్రపంచ వాణిజ్య వాతావరణాన్ని ప్రోత్సహించే సమతుల్య విధానం అవసరమని అభిప్రాయపడ్డారు. దేశంలో సుమారు 80 కోట్లకు పైగా ప్రజలకు ఉచితంగా ఆహార ధాన్యాలను అందిస్తున్నామని ఈ సందర్భంగా ఆయన వివరించారు.

ప్రపంచ వాణిజ్య సంస్థ (డబ్ల్యూటీవో) నిబంధనలకు అనుగుణంగా భారత్ ప్రజా పంపిణీ వ్యవస్థ కింద చిన్న మరియు సన్నకారు రైతుల నుంచి ఆహార ధాన్యాలను సేకరిస్తోందని గోయల్ తెలిపారు. ఆహార లభ్యతను, ధరల నియంత్రణను కాపాడేందుకు అవసరమైన పారదర్శక చర్యలు చేపడుతున్నామని పేర్కొన్నారు. ఆహార భద్రతను కాపాడేందుకు తీసుకునే చట్టబద్ధమైన చర్యలకు, బలవంతపు వాణిజ్య చర్యలకు మధ్య స్పష్టమైన తేడా ఉండాలని ఆయన అభిప్రాయపడ్డారు. జీ20 వేదికగా ఆహారాన్ని ఆయుధంగా మార్చడాన్ని ఖండిస్తూ రూపొందించిన ముసాయిదా పత్రానికి మంత్రులంతా ఏకాభిప్రాయం వ్యక్తం చేయడం విశేషం.

ఈ సదస్సు సందర్భంగా పీయూష్ గోయల్ పలు దేశాల వాణిజ్య మంత్రులు మరియు ప్రతినిధులతో ద్వైపాక్షిక సమావేశాలు నిర్వహించారు. అమెరికా ట్రేడ్ రిప్రజెంటేటివ్, బ్రెజిల్, యూరోపియన్ యూనియన్, బ్రిటన్, మెక్సికో మరియు పోలాండ్ దేశాల కీలక మంత్రులతో ఆయన సమావేశమై వాణిజ్య సంబంధాల బలోపేతంపై చర్చలు జరిపారు. ప్రపంచ వాణిజ్య సంస్థను కేంద్రంగా చేసుకుని నిబంధనలతో కూడిన, పారదర్శకమైన మరియు అందరికీ సమాన అవకాశాలు కల్పించే బహుపాక్షిక వాణిజ్య వ్యవస్థకు భారత్ కట్టుబడి ఉందని ఆయన మరోసారి స్పష్టం చేశారు.