నేపాల్ ప్రధానితో భారత విదేశాంగ కార్యదర్శి విక్రమ్ మిస్రి భేటీ

సూర్య అంతర్జాతీయ డెస్క్: భారత్, నేపాల్ మధ్య ద్వైపాక్షిక సంబంధాలను మరింత పటిష్టం చేసే దిశగా దౌత్యపరమైన ఉన్నత స్థాయి సమావేశాలు జోరుగా సాగుతున్నాయి. అధికారిక పర్యటనలో భాగంగా నేపాల్ రాజధాని కాఠ్మాండు చేరుకున్న భారత విదేశాంగ కార్యదర్శి విక్రమ్ మిస్రి (Vikram Misri), ఆ దేశ ప్రధానమంత్రి బాలేంద్ర షా తో ప్రత్యేకంగా సమావేశమయ్యారు. ఇరు దేశాల మధ్య నెలకొన్న సత్సంబంధాలు, వ్యూహాత్మక భాగస్వామ్యాన్ని మరింత ముందుకు తీసుకెళ్లే అంశాలపై ఈ భేటీలో విస్తృతంగా చర్చించారు.

ప్రధానమంత్రి కార్యాలయంలో జరిగిన ఈ సమావేశంలో రాబోయే రోజుల్లో ఇరు దేశాల మధ్య జరగాల్సిన ఉన్నత స్థాయి పర్యటనలు, ముఖ్యంగా నేపాల్ ప్రధాని భారత్‌లో పర్యమించేందుకు సంబంధించిన ఏర్పాట్లపై ప్రధానంగా చర్చించినట్లు అధికారిక వర్గాలు వెల్లడించాయి. వాణిజ్యం, ఇంధన రంగం, సరిహద్దు మౌలిక వసతులు మరియు కనెక్టివిటీ రంగాల్లో పరస్పర సహకారాన్ని పెంపొందించుకోవడంపై ఇరు నేతలు అభిప్రాయాలను పంచుకున్నారు.

ఈ పర్యటనలో భాగంగా భారత విదేశాంగ కార్యదర్శి నేపాల్ విదేశాంగ కార్యదర్శి అమృత్ బహదూర్ రాయ్‌తో ద్వైపాక్షిక చర్చలు జరపడంతో పాటు, ఆ దేశ విదేశాంగ, ఆర్థిక మరియు ఇంధన శాఖ మంత్రులను కూడా మర్యాదపూర్వకంగా కలిశారు. సాంస్కృతిక, చారిత్రక సంబంధాలు కలిగిన ఈ రెండు దాయాది దేశాల మధ్య సమన్వయం మరింత బలపడుతున్న తీరును ఈ దౌత్య పర్యటన ప్రతిబింబిస్తోందని విశ్లేషకులు అభిప్రాయపడుతున్నారు.