అమెరికాలో 3 లక్షల వీసాల రద్దు.. నేరస్థులపై ఉక్కుపాదం!

సూర్య ఇంటర్నేషనల్ & ఇమ్మిగ్రేషన్ డెస్క్, వాషింగ్టన్: డొనాల్డ్ ట్రంప్ నేతృత్వంలోని అమెరికా ప్రభుత్వం ఇమ్మిగ్రేషన్ నిబంధనల ఉల్లంఘనలు, విదేశీ పౌరుల నేరపూరిత కార్యకలాపాలపై కఠిన చర్యలను మరింత వేగవంతం చేసింది. ట్రంప్ రెండోసారి అధికారంలోకి వచ్చిన తర్వాత రికార్డు స్థాయిలో 3,00,000 కంటే ఎక్కువ వీసాలను రద్దు చేసినట్లు అమెరికా విదేశాంగ శాఖ అధికారికంగా వెల్లడించింది. అమెరికా చరిత్రలో ఇంతటి స్వల్ప వ్యవధిలో ఇంత భారీ సంఖ్యలో వీసాలను రద్దు చేయడం మునుపెన్నడూ జరగలేదని అధికారులు స్పష్టం చేశారు.

నేరపూరిత చర్యలు, ప్రజా భద్రతే ప్రాతిపదిక:
చట్టాలను ఉల్లంఘించేవారు, జాతీయ భద్రతకు ముప్పుగా పరిణమించే విదేశీయులపై కఠిన చర్యలు కొనసాగుతాయని స్టేట్ డిపార్ట్‌మెంట్ ప్రతినిధి పిగాట్ పేర్కొన్నారు. రద్దు చేసిన వీసాలలో గణనీయమైన భాగం నేరపూరిత ప్రవర్తనకు సంబంధించినవే ఉన్నట్లు గణాంకాలు వెల్లడిస్తున్నాయి. రద్దయిన వాటిలో దాదాపు 25 శాతం వీసాలు భౌతిక దాడులు మరియు సంబంధిత నేరాలకు సంబంధించినవి కాగా, 22 శాతం మద్యం సేవించి వాహనాలు నడపడం (DUI), 7 శాతం దొంగతనాలు, మరో 7 శాతం మాదకద్రవ్యాల వినియోగం లేదా పంపిణీకి సంబంధించిన నేరాల వల్ల రద్దయ్యాయి.

బర్త్ టూరిజం, అక్రమ మార్గాలపై ప్రత్యేక దృష్టి:
ఈ చర్యల్లో భాగంగా బర్త్ టూరిజం (అమెరికాలో జన్మించి పౌరసత్వం పొందేందుకు వీసా దుర్వినియోగం చేయడం) నెట్‌వర్క్‌లకు సంబంధించి కనీసం 4,000 వీసాలను రద్దు చేయడంతో పాటు నేరపూరిత ఆరోపణలు, అనుమానాస్పద సంబంధాలు ఉన్న 6,000 మంది విదేశీ విద్యార్థుల వీసాలను కూడా రద్దు చేసినట్లు వైట్‌హౌస్ ప్రకటనలో పేర్కొంది. గత నెల నాటికి 2,50,000గా ఉన్న ఈ సంఖ్య, కన్సులర్ వ్యవహారాల విభాగం చేపట్టిన తీవ్ర సమీక్షల అనంతరం తాజాగా 3 లక్షల మైలురాయిని దాటింది. అమెరికా పౌరుల రక్షణ, దేశ అంతర్గత భద్రతకే తమ మొదటి ప్రాధాన్యతని ట్రంప్ ప్రభుత్వం పునరుద్ఘాటించింది.