ఆరెంజ్ కౌంటీ టీచర్ల కాంట్రాక్ట్ వివాదం: స్కూల్ బోర్డు కీలక సమావేశం వాయిదా.. హెల్త్ ఇన్సూరెన్స్ అంశంపై పీటముడి!

సూర్య ఇంటర్నేషనల్ డెస్క్, ఒర్లాండో (ఫ్లోరిడా): అమెరికాలోని ఫ్లోరిడా రాష్ట్రంలో గల ఆరెంజ్ కౌంటీ పబ్లిక్ స్కూల్స్  మరియు ఉపాధ్యాయ సంఘం  మధ్య నెలకొన్న కాంట్రాక్ట్ వివాదం మరింత జటిలంగా మారింది. టీచర్ల కాంట్రాక్ట్ ప్రతిష్టంభన  పరిష్కారంపై ఓటింగ్ నిర్వహించేందుకు బుధవారం జరగాల్సిన కీలక స్కూల్ బోర్డు సమావేశం అర్ధాంతరంగా వాయిదా పడింది. ప్రధానంగా హెల్త్ ఇన్సూరెన్స్ ప్రయోజనాలు, ప్రీమియం పెంపుపై గత ఏప్రిల్ నెల నుంచి ఇరు వర్గాల మధ్య తీవ్ర విభేదాలు కొనసాగుతున్నాయి.

మెజిస్ట్రేట్ సిఫార్సులను తోసిపుచ్చిన స్కూల్ డిస్ట్రిక్ట్:
ఈ ప్రతిష్టంభనకు పరిష్కారం చూపేందుకు ప్రభుత్వం నియమించిన ప్రత్యేక మెజిస్ట్రేట్ అందించిన సిఫార్సులను అమలు చేయడం తమ వల్ల కాదని స్కూల్ డిస్ట్రిక్ట్ యాజమాన్యం మంగళవారం తిరస్కరించింది. ఆ సిఫార్సులను ఆమోదిస్తే పాఠశాల బోర్డుపై మోయలేని ఆర్థిక భారం పడుతుందని యాజమాన్యం పేర్కొంది. దీనికితోడు, ఈ అంశంపై నిర్ణయం ఆలస్యమయ్యే ప్రతి నెలా బోర్డుకు దాదాపు 20 మిలియన్ డాలర్ల అదనపు భారం పడుతోందని వివరించింది.

జీతాల కోతతో సమానమంటున్న టీచర్ల యూనియన్:
మరోవైపు, స్కూల్ డిస్ట్రిక్ట్ ప్రతిపాదించిన కొత్త నిబంధనలు ఆమోదిస్తే ఉపాధ్యాయుల జీతాల్లో కోత విధించినట్లే అవుతుందని ఉపాధ్యాయ సంఘాలు తీవ్ర ఆగ్రహం వ్యక్తం చేస్తున్నాయి. ఇప్పటికే అరకొర వేతనాలతో పనిచేస్తున్న ఉపాధ్యాయులపై ఆరోగ్య బీమా ఖర్చుల భారం మోపడం ఏమాత్రం ఆమోదయోగ్యం కాదని వారు స్పష్టం చేశారు. డిస్ట్రిక్ట్ యాజమాన్యం అనుసరిస్తున్న తీరుపై కార్మిక వ్యతిరేక విధానాల కింద న్యాయపరమైన చర్యలు చేపట్టేందుకు కూడా యూనియన్ సిద్ధమవుతోంది. సమావేశం వాయిదా పడటంతో తదుపరి ఓటింగ్ తేదీని త్వరలోనే ప్రకటించనున్నారు.