అనివార్య కారణాలతో ప్రవీణ్ అరోర రథయాత్ర వాయిదా

సూర్య - మానకొండూర్ :సామాజిక వేత్త ప్రవీణ్ అరోర దేశవ్యాప్తంగా ఆర్థిక ఆధారిత రిజర్వేషన్లు అమలు చేయాలనే డిమాండ్‌తో చేపట్టిన రథయాత్ర అనివార్య కారణాల వల్ల తాత్కాలికంగా వాయిదా పడింది. గాంధీ జయంతి రోజైన అక్టోబర్ 2న ఢిల్లీలోని రాజ్ ఘాట్ వద్ద ప్రారంభమైన ఈ యాత్ర, పలు రాష్ట్రాల్లో విజయవంతంగా పూర్తి చేసుకుని తెలంగాణలోకి ప్రవేశించిన తరుణంలో ఈ నిర్ణయం తీసుకున్నారు. కొంత విరామం అనంతరం ఈ రథయాత్ర మళ్లీ యథావిధిగా కొనసాగుతుందని నిర్వాహకులు ప్రకటించారు.దేశంలో ఆర్థిక ప్రాతిపదికన రిజర్వేషన్లు కల్పించాలనే ప్రధాన డిమాండ్‌తో ప్రముఖ సామాజిక వేత్త ప్రవీణ్ అరోర ప్రతిష్టాత్మకంగా చేపట్టిన రథయాత్రకు తెలంగాణలో తాత్కాలిక విరామం లభించింది. అక్టోబర్ 2న ప్రారంభమైన ఈ యాత్రకు వివిధ రాష్ట్రాల్లో ప్రజల నుంచి, సామాజిక సంఘాల నుంచి విశేష స్పందన లభించింది.తెలంగాణలో రథయాత్ర ప్రవేశించిన సందర్భంగా ఏర్పాటు చేసిన ప్రత్యేక కార్యక్రమంలో పలువురు ప్రముఖ సామాజిక, కుల సంఘాల నాయకులు పాల్గొని తమ మద్దతును పంచుకున్నారు. ఈ కార్యక్రమంలో రాష్ట్ర రెడ్డి జేఏసీ అధ్యక్షులు అప్పంమ్మ గారి రాంరెడ్డి, ఒసి జేఏసీ రాష్ట్ర అధ్యక్షులు గోపు జైపాల్ రెడ్డి, రాష్ట్ర ఐక్యవేదిక అధ్యక్షులు నాగర్తి చంద్రారెడ్డి, ఉత్తర తెలంగాణ అధ్యక్షులు పెండ్యాల రాంరెడ్డి, కరీంనగర్ జిల్లా అధ్యక్షులు ఏనుగు చుక్కారెడ్డి, రాష్ట్ర రెడ్డి జేఏసీ వర్కింగ్ ప్రెసిడెంట్ పైళ్ళ హరినాథ్ రెడ్డి, రాష్ట్ర నాయకులు చందుపట్ల నర్సింహారెడ్డి, రెడ్డి ఐక్యవేదిక రాష్ట్ర నాయకులు నల్లవెల్లి కరుణాకర్ రెడ్డిలతో పాటు పలువురు ముఖ్య నాయకులు పాల్గొన్నారు. కొన్ని అనివార్య కారణాల వల్లే ప్రస్తుతం యాత్రను ఆపాల్సి వచ్చిందని, త్వరలోనే పూర్తి కార్యాచరణతో రథయాత్ర తిరిగి ప్రారంభమవుతుందని నేతలు ఈ సందర్భంగా వెల్లడించారు.