'35 చిన్న కథ కాదు' ఫేమ్ విశ్వదేవ్ హీరోగా నూతన చిత్రం ప్రారంభం: శ్రీ తులసి క్రియేటివ్ వర్క్స్ ప్రొడక్షన్ నెం.1 అనౌన్స్‌మెంట్
సూర్య ఎంటర్‌టైన్‌మెంట్ డెస్క్: '35 చిన్న కథ కాదు' సినిమాతో నటుడిగా మంచి గుర్తింపు తెచ్చుకున్న కథానాయకుడు విశ్వదేవ్ హీరోగా కొత్త ప్రాజెక్ట్ అధికారికంగా ప్రారంభమైంది. శ్రీ తులసి క్రియేటివ్ వర్క్స్ బ్యానర్‌పై ప్రొడక్షన్ నెం.1గా ఈ చిత్రాన్ని నిర్మిస్తున్నారు. గతంలో 'ముఖచిత్రం' చిత్రంతో విమర్శకుల ప్రశంసలు అందుకున్న దర్శకుడు గంగాధర్ ఈ సినిమా ద్వారా నిర్మాతగా మారి ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. ఈ నూతన చిత్రంతో నర్సి రాజగిరి అనే కొత్త ప్రతిభావంతుడు దర్శకుడిగా టాలీవుడ్‌కు పరిచయం అవుతున్నారు.
ఈ సినిమాకు సంబంధించిన అధికారిక ప్రకటనను చిత్ర మేకర్స్ శనివారం వెల్లడించారు. సరికొత్త కాన్సెప్ట్, వినూత్నమైన కథాంశంతో రూపొందుతున్న ఈ చిత్రం అన్ని వర్గాల ప్రేక్షకులను విశేషంగా ఆకట్టుకుంటుందని చిత్ర యూనిట్ ఆశాభావం వ్యక్తం చేసింది. ముఖచిత్రం సినిమాతో టాలెంట్ నిరూపించుకున్న గంగాధర్ ఇప్పుడు నిర్మాతగా మారి కొత్త టాలెంట్‌ను ప్రోత్సహిస్తుండటం పట్ల సినీ వర్గాల నుంచి అభినందనలు వ్యక్తమవుతున్నాయి.
యువ నటుడు విశ్వదేవ్ తన వైవిధ్యమైన నటనతో ప్రేక్షకుల్లో ప్రత్యేక ముద్ర వేసుకున్నారు. ఇప్పుడు నర్సి రాజగిరి అందించిన విభిన్నమైన కథకు ఆయన వెంటనే ఓకే చెప్పినట్లు సమాచారం. నూతన సాంకేతిక నిపుణులు, నటీనటులతో తెరకెక్కనున్న ఈ ప్రాజెక్ట్‌కు సంబంధించిన నటీనటులు, ఇతర సాంకేతిక వర్గం వివరాలను త్వరలోనే అధికారికంగా వెల్లడిస్తామని మేకర్స్ స్పష్టం చేశారు.
Also Read: 'ఫీల్ గుడ్' చిత్రం నుండి యూత్‌ఫుల్ మెలోడీ 'మమ్మా మియా' పాట విడుదల
