టాలీవుడ్ నటి సంచలన అరెస్ట్.. డాక్టర్‌ను ఫ్లాట్‌కు పిలిచి బెదిరించి దోపిడీ చేసిన అతుల్య చంద్ర!
సూర్య డెస్క్: తెలుగు, మలయాళ చిత్ర పరిశ్రమలలో నటిగా గుర్తింపు తెచ్చుకున్న అతుల్య చంద్ర తీవ్రమైన నేరారోపణలతో పోలీసుల అదుపులోకి తీసుకోవడం సినీ వర్గాలలో సంచలనం సృష్టించింది. మత్తు వదలరా చిత్రంతో తెలుగు ప్రేక్షకులకు పరిచయమైన ఈ నటి, కేరళలోని కొచ్చిలో ఒక ప్రముఖ వైద్యుడిని లక్ష్యంగా చేసుకుని ముఠాగా ఏర్పడి దోపిడీకి పాల్పడినట్లు ఆరోపణలు ఎదుర్కొంటున్నారు. బంధువుకు వైద్యం కావాలనే నెపంతో డాక్టర్‌ను తమ అపార్ట్‌మెంట్‌కు రప్పించి, అక్కడ భయభ్రాంతులకు గురిచేసి నగదు, విలువైన వస్తువులను లాక్కున్న ఘటన ప్రస్తుతం తీవ్ర చర్చనీయాంశమైంది.
కొచ్చిలోని ఒక అపార్ట్‌మెంట్‌లో నటుడు, నిర్మాత బిబిన్ పెరుంబిల్లితో కలిసి ఉన్న అతుల్య చంద్ర సోమవారం ఉదయం స్థానిక వైద్యుడికి అత్యవసరంగా ఫోన్ చేశారు. ఇంట్లో ఉన్న బంధువుకు అనారోగ్యంగా ఉందని, వెంటనే వచ్చి వైద్య సహాయం అందించాలని డాక్టర్‌ను కోరారు. ఆ మాట నమ్మి ఉదయం ఆరు గంటల ప్రాంతంలో ఫ్లాట్‌కు చేరుకున్న డాక్టర్‌కు అక్కడ ఊహించని షాక్ తగిలింది. అప్పటికే ఆ ఫ్లాట్‌లో దాదాపు పన్నెండు మంది యువతీ యువకులు గుమికూడి ఉన్నారు. వారంతా కలిసి సదరు వైద్యుడిపై భౌతిక దాడికి పాల్పడి, ఆయన వద్ద ఉన్న మొబైల్ ఫోన్, నగదు, ఖరీదైన వాచ్‌తో పాటు వైర్‌లెస్ ఇయర్‌ఫోన్లను బలవంతంగా లాక్కున్నారు.
ఈ దారుణ ఉదంతం బయటకు పొక్కకుండా ఉండేందుకు నిందితులు వైద్యుడిని తీవ్రంగా హెచ్చరించినట్లు పోలీసుల దర్యాప్తులో వెల్లడైంది. జరిగిన విషయాన్ని బయట ఎవరికైనా చెబితే, వైద్యం కోసం వచ్చిన డాక్టర్ తమ బంధువుపై అత్యాచారానికి యత్నించాడంటూ తప్పుడు కేసు పెట్టి జీవితాన్ని నాశనం చేస్తామంటూ వారు బెదిరించారు. ఆ ప్రాణభయం నుంచి ఎలాగోలా తప్పించుకున్న బాధిత డాక్టర్ వెంటనే స్థానిక పోలీస్ స్టేషన్‌ను ఆశ్రయించి జరిగిన ఘోరంపై ఫిర్యాదు చేశారు. బాధితుడి ఫిర్యాదు ఆధారంగా రంగంలోకి దిగిన కొచ్చి పోలీసులు వెంటనే ప్రాథమిక విచారణ జరిపి, అతుల్య చంద్రతో పాటు ఆమె సహచరులను అదుపులోకి తీసుకున్నారు.
సినీ రంగంలో మంచి అవకాశాలు వస్తున్న సమయంలో ఇలాంటి వివాదాస్పద నేరంలో నటి చిక్కుకోవడం అందరినీ దిగ్భ్రాంతికి గురిచేసింది. కేవలం డబ్బు కోసం ఒక పథకం ప్రకారం వైద్యుడిని ట్రాప్ చేసి ఈ రాబరీకి పాల్పడ్డారా లేక దీని వెనుక వేరే కారణాలు ఏమైనా ఉన్నాయా అనే కోణంలో పోలీసులు లోతుగా దర్యాప్తు చేస్తున్నారు. ఈ ఘటనకు సంబంధించి మరింత మంది ప్రమేయం ఉండే అవకాశం ఉందని భావిస్తున్న పోలీసులు, అరెస్ట్ అయిన నిందితులను విచారిస్తూ కేసును వేగవంతం చేశారు.
Also Read: ఈఈ మెరిట్ టెస్ట్–2027 పాఠశాలల రిజిస్ట్రేషన్ ప్రారంభించిన కన్వీనర్ పుట్టంరాజు.
