telangana
పందుల పెంపకందారుల కుటుంబాలకు ప్రత్యామ్నాయ జీవనోపాధి కల్పించాలి.. సమస్యలపై సానుకూలంగా స్పందించిన స్పీకర్ గడ్డం ప్రసాద్ కుమార్
వికారాబాద్ జిల్లా ప్రతినిధి, మేజర్ న్యూస్: వికారాబాద్ మున్సిపల్ పరిధిలో పందుల పెంపకంపై ఆధారపడి జీవనం సాగిస్తున్న తమ కుటుంబాల జీవనోపాధికి భరోసా కల్పించాలని కోరుతూ సుమారు 30 కుటుంబాల సభ్యులు శుక్రవారం వికారాబాద్ పట్టణంలోని ప్రజాభవన్‌లో తెలంగాణ శాసనసభాపతి, వికారాబాద్ ఎమ్మెల్యే గడ్డం ప్రసాద్ కుమార్‌ను కలిసి వినతిపత్రం అందజేశారు.ఈ సందర్భంగా పందుల పెంపకందారులు మాట్లాడుతూ తాము ఎన్నో ఏళ్లుగా పందుల పెంపకాన్నే ప్రధాన జీవనాధారంగా చేసుకుని కుటుంబాలను పోషించుకుంటున్నామని తెలిపారు. అయితే ఇటీవల మున్సిపల్ అధికారులు పట్టణ పరిధిలో ఉన్న పందులన్నింటినీ తొలగించాలని తమకు నోటీసులు జారీ చేసినట్లు స్పీకర్ దృష్టికి తీసుకెళ్లారు. ఈ నోటీసుల కారణంగా తమ కుటుంబాల జీవనోపాధి ప్రశ్నార్థకంగా మారిందని ఆవేదన వ్యక్తం చేశారు.పందుల పెంపకం తప్ప తమకు మరో జీవనోపాధి మార్గం లేదని, ఉన్నట్టుండి ఈ వృత్తిని నిలిపివేయాల్సి వస్తే తమ కుటుంబాలు ఆర్థికంగా తీవ్ర ఇబ్బందులు ఎదుర్కోవాల్సి వస్తుందని వివరించారు. తమ పరిస్థితిని మానవతా దృక్పథంతో పరిశీలించి, జీవనోపాధి కోల్పోకుండా ప్రత్యామ్నాయ ఉపాధి అవకాశాలు లేదా ఆర్థిక సహాయం కల్పించాలని విజ్ఞప్తి చేశారు.సుమారు 30 కుటుంబాల సమస్యలను విన్న స్పీకర్ గడ్డం ప్రసాద్ కుమార్ సానుకూలంగా స్పందించారు. తమ సమస్యల పరిష్కారంపై స్పీకర్ సానుకూలంగా స్పందించడంతో పందుల పెంపకందారులు హర్షం వ్యక్తం చేస్తూ ఆయనకు కృతజ్ఞతలు తెలిపారు.
