‘ది ట్రెయిటర్స్’తో ఎక్సైట్‌మెంట్, థ్రిల్‌ని తెలుగు ఆడియన్స్ ముందుకు తీసుకురావడం చాలా ఆనందంగా ఉంది: తేజ సజ్జ
సూర్య ఎంటర్‌టైన్‌మెంట్ డెస్క్: ప్రముఖ ఓటీటీ ప్లాట్‌ఫాం అమెజాన్ ప్రైమ్ వీడియో అత్యంత ప్రతిష్టాత్మకంగా తెరకెక్కించిన రియాలిటీ షో 'ది ట్రెయిటర్స్ తెలుగు' ట్రైలర్‌ను తాజాగా విడుదల చేసింది. నమ్మకం, మోసం, ద్రోహం మరియు మైండ్ గేమ్స్ ప్రధానాంశంగా సాగే ఈ ఉత్కంఠభరితమైన షో ట్రైలర్ ప్రస్తుతం ప్రేక్షకులలో భారీ అంచనాలను రేకెత్తిస్తోంది. ప్రపంచవ్యాప్తంగా సంచలనం సృష్టించిన ఈ అంతర్జాతీయ రియాలిటీ ఫార్మాట్‌ను తెలుగు ప్రేక్షకులకు సరికొత్త అనుభూతిని పంచేలా ప్రత్యేకమైన స్థానిక హంగులతో తీసుకొస్తున్నారు. విభిన్న రంగాలకు చెందిన 20 మంది ప్రముఖ సెలబ్రిటీలు ఈ గేమ్‌లో పోటీదారులుగా బరిలోకి దిగుతుండటంతో షోపై ఆసక్తి తారాస్థాయికి చేరింది.
ఈ షో ద్వారా టాలెంటెడ్ యంగ్ హీరో తేజ సజ్జ హోస్ట్‌గా తొలిసారిగా డిజిటల్ రంగంలోకి అడుగుపెడుతున్నారు. మొత్తం 10 ఎపిసోడ్లుగా రూపొందిన ఈ సిరీస్‌లో పోటీదారులు ఎవరిని నమ్మాలో, ఎవరిని అనుమానిచాలో తెలియని క్లిష్టమైన వాతావరణంలో అడుగుపెడతారు. తమలో దాగి ఉన్న ట్రెయిటర్స్‌ను ఇన్నోసెంట్స్ సమయం ముగిసేలోపు ఎలా కనిపెడతారనే ఉత్కంఠ ఈ షో ప్రధాన హైలైట్‌గా నిలవనుంది. ట్రైలర్ లాంచ్ ఈవెంట్‌లో పాల్గొన్న హీరో తేజ సజ్జ మాట్లాడుతూ, ది ట్రెయిటర్స్‌తో ఎక్సైట్‌మెంట్, థ్రిల్‌ని తెలుగు ఆడియన్స్ ముందుకు తీసుకురావడం చాలా ఆనందంగా ఉందని పేర్కొన్నారు. ప్రపంచవ్యాప్తంగా పాపులర్ అయిన ఈ ఫార్మాట్‌లో తొలి తెలుగు ఎడిషన్‌కు హోస్ట్‌గా వ్యవహరించడం ఎంతో ఎగ్జైటింగ్‌గా ఉందని, తెలుగు ఎంటర్‌టైన్‌మెంట్ రంగంలో ఇది ఒక చారిత్రాత్మక ఘట్టమని తెలిపారు.
చిన్మయీ శ్రీపాద, హర్ష వర్ధన్, ప్రగతి మహావాది, శ్రీదేవి చౌదరి, నిఖిల్ విజయేంద్ర సింహ, విద్యూ రామన్, విష్ణు ఓయ్, శ్రావ్య వర్మ, సాయి రోనక్ వంటి ప్రముఖులు ఈ షోలో కంటెస్టెంట్లుగా పాల్గొంటున్నారు. ఎస్ఓఎల్ ప్రొడక్షన్స్ సంస్థ నిర్మించిన ఈ సిరీస్ తెలుగుతో పాటు ఇంగ్లీష్ సబ్‌టైటిల్స్‌తో ప్రైమ్ వీడియోలో ప్రత్యేకంగా స్ట్రీమింగ్ కానుంది. ప్రతి గురువారం మధ్యాహ్నం 12 గంటలకు కొత్త ఎపిసోడ్ విడుదల కానుండటంతో ప్రేక్షకులు ఈ మైండ్ గేమ్‌ను ఎంతగానో ఆస్వాదించవచ్చని మేకర్స్ తెలిపారు. ప్రైమ్ వీడియోలో ఇప్పటికే హిందీలో ఘన విజయం సాధించిన ఈ ఫ్రాంచైజ్, తెలుగులో కూడా అదే స్థాయి సంచలనం సృష్టిస్తుందని ట్రేడ్ వర్గాలు అంచనా వేస్తున్నాయి.
అబద్ధాలు, ఊహించని పొత్తులు, వ్యూహాత్మక మోసాలతో సాగే ఈ షో ప్రేక్షకులను చివరి వరకు సీట్ ఎడ్జ్‌లో కూర్చోబెట్టడం ఖాయమని ట్రైలర్ చూస్తే స్పష్టమవుతోంది. హోస్ట్‌గా తేజ సజ్జ తనదైన ఎనర్జీతో షోను ముందుకు నడిపిస్తున్న తీరు ప్రేక్షకులను కట్టిపడేస్తోంది. సినిమా స్థాయి ప్రొడక్షన్ వాల్యూస్‌తో తెరకెక్కుతున్న ఈ రియాలిటీ షో తెలుగు ఓటీటీ చరిత్రలో సరికొత్త రికార్డులను సృష్టించే అవకాశం ఉంది. త్వరలోనే అఫీషియల్ స్ట్రీమింగ్ ప్రారంభం కానున్న ఈ ఉత్కంఠభరితమైన గేమ్‌ను చూసేందుకు సినీ ప్రియులు ఎంతో ఆసక్తిగా ఎదురుచూస్తున్నారు.
