తమిళనాడులో సినిమా షోల వేళల్లో మార్పులు.. ఉదయం 6 గంటల నుంచి అర్ధరాత్రి వరకు అనుమతి కోరిన నిర్మాతలు

సూర్య ఎంటర్‌టైన్‌మెంట్ డెస్క్: తమిళనాడులో సినిమా ప్రదర్శన వేళలకు సంబంధించి కోలీవుడ్ వర్గాల నుంచి కీలక డిమాండ్ తెరపైకి వచ్చింది. రాష్ట్రంలో సినిమా థియేటర్ల నిర్వహణను మరింత మెరుగుపరచాలని, చిత్ర పరిశ్రమ ఎదుర్కొంటున్న ఆర్థిక సమస్యలకు పరిష్కారం చూపాలని కోరుతూ తమిళ సినీ నిర్మాతల సంఘాల ప్రతినిధులు ప్రభుత్వానికి విజ్ఞప్తి చేశారు. సినిమాటోగ్రఫీ మంత్రి రాజ్ మోహన్ అధ్యక్షతన చెన్నైలోని ట్రిప్లికేణి కలైవానర్ అరంగంలో తమిళ సినీ ప్రముఖులు మరియు వివిధ నిర్మాతల సంఘాల ముఖ్యులతో ప్రత్యేక సమావేశం జరిగింది. ఈ భేటీలో పరిశ్రమ అభివృద్ధికి అవసరమైన పలు కీలక అంశాలపై విస్తృతంగా చర్చించారు.

ఇతర దక్షిణ భారత రాష్ట్రాలైన ఆంధ్రప్రదేశ్, తెలంగాణ, కర్ణాటక మరియు కేరళలో అమల్లో ఉన్న విధంగానే తమిళనాడులో కూడా ఉదయం 6 గంటల నుంచే మొదటి ఆటను ప్రదర్శించుకునేలా వెసులుబాటు కల్పించాలని నిర్మాతలు కోరారు. ఉదయం 6 గంటల నుంచి రాత్రి అర్ధరాత్రి వరకు నిరంతరంగా సినిమా షోలు ప్రదర్శించేందుకు అనుమతి ఇవ్వాలని వారు ప్రభుత్వానికి విజ్ఞప్తి చేశారు. ఇలా చేయడం వల్ల ఒకే రోజులో ఐదు నుంచి ఆరు షోలను ప్రదర్శించే అవకాశం లభిస్తుందని, దీని ద్వారా బాక్సాఫీస్ వద్ద కలెక్షన్లు మెరుగవుతాయని వారు అభిప్రాయపడ్డారు. ముఖ్యంగా ఒకే రోజు పలు సినిమాలు విడుదలైన సందర్భాల్లో థియేటర్ల సర్దుబాటు సమస్య తలెత్తకుండా ఉండేందుకు ఈ నిర్ణయం ఎంతగానో దోహదపడుతుందని నిర్మాతలు స్పష్టం చేశారు.

ఈ సమావేశంలో కేవలం షోల సమయాల పెంపుదల మాత్రమే కాకుండా మరికొన్ని ప్రధాన డిమాండ్లను కూడా నిర్మాతలు మంత్రి ముందుంచారు. కొత్తగా విడుదలయ్యే సినిమాలను కనీసం ఎనిమిది వారాల గడువు పూర్తయిన తర్వాతే ఓటీటీ వేదికలలో స్ట్రీమింగ్ చేసేలా నిబంధనలు గా అమలు చేయాలని కోరారు. అలాగే నిర్మాతలు ఎదుర్కొంటున్న ఆర్థిక ఇబ్బందులను దృష్టిలో ఉంచుకుని ప్రభుత్వమే స్వయంగా ఒక ప్రత్యేక ఓటీటీ ప్లాట్‌ఫామ్‌ను ఏర్పాటు చేయాలని, విడుదలకు నోచుకోని చిన్న చిత్రాలను థియేటర్లలోకి తీసుకురావడానికి తగిన చర్యలు తీసుకోవాలని విజ్ఞప్తి చేశారు. చిన్నబడ్జెట్ సినిమాలకు ప్రభుత్వపరంగా సబ్సిడీలు అందించి ఆదుకోవాలని వారు కోరారు. నిర్మాతలు లేవనెత్తిన ఈ విజ్ఞప్తులన్నింటినీ సానుకూలంగా ఆలకించిన మంత్రి రాజ్ మోహన్, తమిళ సినీ పరిశ్రమ అభివృద్ధికి ప్రభుత్వం తరపు నుంచి తగిన సహాయ సహకారాలు అందిస్తామని, త్వరలోనే సానుకూల నిర్ణయాలు తీసుకుంటామని హామీ ఇస్తూ భేటీని ముగించారు.

Also Read: దీపావళికి ముందే భారీగా తగ్గిన బంగారం, వెండి ధరలు.. అక్టోబర్ 30న తులం ఎంతంటే?