ఏఐ టెక్నాలజీపై వస్తున్న విమర్శలపై స్పందించిన డైరెక్టర్ సుందర్ సి.. మూకిత్తి అమ్మన్ 2 గ్రాఫిక్స్ పై క్లారిటీ

సూర్య ఎంటర్‌టైన్‌మెంట్ డెస్క్: లేడీ సూపర్ స్టార్ నయనతార,  ప్రధాన పాత్రలో నటిస్తున్న అత్యంత ప్రతిష్టాత్మక ఫాంటసీ చిత్రం మూకిత్తి అమ్మన్ 2 గురించి టాలీవుడ్ మరియు కోలీవుడ్ వర్గాల్లో భారీ అంచనాలు నెలకొన్నాయి. సీనియర్ దర్శకుడు సుందర్ సి దర్శకత్వంలో తెరకెక్కుతున్న ఈ సినిమాకు సంబంధించి ఇటీవల కొందరు చేసిన విమర్శలపై ఆయన తొలిసారిగా స్పందించారు. సినిమాలో గ్రాఫిక్స్ మరియు వీఎఫ్ఎక్స్ సన్నివేశాలపై కొందరు కావాలనే తప్పుడు ప్రచారం చేశారని, కేవలం కొద్దిపాటి షాట్లకు మాత్రమే ఏఐ టెక్నాలజీని వాడామని ఆయన స్పష్టం చేశారు. సినిమాపై వస్తున్న వదంతులకు ఆయన ఇచ్చిన వివరణ ప్రస్తుతం సోషల్ మీడియాలో వైరల్ అవుతోంది.

ఈ సినిమా ప్రీ రిలీజ్ మరియు ప్రమోషనల్ కార్యక్రమాల సందర్భంగా మీడియాతో మాట్లాడిన సుందర్ సి, చిత్ర నిర్మాణంలో జరిగిన శ్రమను పంచుకున్నారు. మూకిత్తి అమ్మన్ చిత్రానికి తొలి భాగానికి, ఈ రెండో భాగానికి నయన్‌తార, ఊర్వసి వంటి ప్రధాన తారాగణం మినహా కథాకథనాలు పూర్తిగా భిన్నంగా ఉంటాయని ఆయన తెలిపారు. ఈ ప్రాజెక్ట్ ఇంత భారీ స్థాయిలో వస్తుందని మొదట్లో ఊహించలేదని, సుమారు నాలుగు వందల మందికి పైగా కళాకారులు ఈ సినిమా కోసం రేయింబవళ్లు కష్టపడ్డారని ఆయన వెల్లడించారు. సినిమాకు సంబంధించిన కొన్ని విజువల్స్ చూసి కొందరు నెటిజన్లు దీని పూర్తిగా ఏఐ సాంకేతికతతో తయారు చేశారంటూ విమర్శలు గుప్పించారని గుర్తుచేశారు.

అయితే ఆ విమర్శలను తీవ్రంగా ఖండించిన సుందర్ సి, ఏఐ టెక్నాలజీని తాను చిన్నచూపు చూడనప్పటికీ, సినిమాలో దాని వాడకం చాలా తక్కువని స్పష్టం చేశారు. ఈ చిత్రంలో ఏకంగా మూడు వేలకు పైగా షాట్లను కేవలం కంపి్యూటర్ గ్రాఫిక్స్ మరియు వీఎఫ్ఎక్స్ ద్వారా అత్యంత ప్రతిభావంతులైన టెక్నీషియన్లతో రూపొందించామని ఆయన తెలిపారు. చిత్రంలోని మొత్తం వేలకొద్దీ గ్రాఫిక్స్ షాట్లలో కేవలం పదిహేను షాట్లకు మాత్రమే కృత్రిమ మేధస్సును వినియోగించామని, అలాంటప్పుడు సినిమా అంతా ఏఐతోనే తీశారనడంలో ఎలాంటి నిజం లేదని ఆయన కుండబద్దలు కొట్టారు.

తన సుదీర్ఘ సినీ ప్రయాణంలో అత్యంత సవాల్‌తో కూడుకున్న ప్రాజెక్ట్‌గా మూకిత్తి అమ్మన్ 2 నిలిచిందని సుందర్ సి పేర్కొన్నారు. ఈ భారీ బడ్జెట్ సోషియో ఫాంటసీ చిత్రంలో నయన్‌తార  తో పాటు రెజీనా కస్సాంద్రా పాత్రలు అత్యంత కీలకంగా ఉంటాయని, విజువల్ వండర్‌గా సినిమా ప్రేక్షకుల ముందుకు రానుందని ఆయన ధీమా వ్యక్తం చేశారు. కష్టపడి రూపొందించిన గ్రాఫిక్స్ వర్క్‌పై వస్తున్న వదంతులను నమ్మవద్దని, థియేటర్లలో ఈ అద్భుతమైన అనుభూతిని ప్రేక్షకులు కచ్చితంగా ఆస్వాదిస్తారని ఆయన కోరారు. త్వరలోనే విడుదల కానున్న ఈ సినిమా తెలుగు, తమిళ భాషల్లో భారీ విజయం సాధిస్తుందనే నమ్మకంతో చిత్ర యూనిట్ ఉంది.

Also Read: కోట్లు విలువ చేసే విలాసవంతమైన ఇల్లు నిర్మించిన ప్రముఖ కమెడియన్ వడివేలు.. ఫోటోలు వైర