సౌత్ సినిమాలకు అందుకే దూరమయ్యా.. వర్ణ వివక్షపై నటి రాధికా ఆప్టే సంచలన వ్యాఖ్యలు
సూర్య ఎంటర్‌టైన్‌మెంట్ డెస్క్: భారతీయ చిత్రసీమలో తనదైన నటనతో ప్రత్యేక గుర్తింపు తెచ్చుకున్న నటి రాధికా ఆప్టే దక్షిణ భారత చిత్ర పరిశ్రమపై పలు ఆసక్తికర వ్యాఖ్యలు చేశారు. దాదాపు రెండు దశాబ్దాల సినీ ప్రయాణంలో తమిళం, తెలుగు భాషల్లో కబాలి, వెట్రి సెల్వన్, లయన్ వంటి పలు విజయవంతమైన చిత్రాల్లో నటించిన ఆమె, గత కొన్నేళ్లుగా దక్షణాది సినిమాలకు దూరంగా ఉండటానికి గల కారణాలను వెల్లడించారు. ఇటీవల ఒక ప్రముఖ మీడియా సంస్థకు ఇచ్చిన ఇంటర్వ్యూలో మాట్లాడిన ఆమె, సౌత్ చిత్ర పరిశ్రమలో కథానాయికల ఎంపికలో తెల్లటి చర్మం ఉన్న ఉత్తరాది నటీమణులకే ఎక్కువ ప్రాధాన్యత ఇస్తున్నారనే అభిప్రాయాన్ని వ్యక్తం చేశారు. దక్షిణ భారతదేశంలోనే అత్యంత ప్రతిభావంతులు, అందమైన నటీమణులు ఉన్నప్పటికీ, భాష రాని వారికి అవకాశం ఇవ్వడంపై ఆమె ఆశ్చర్యాన్ని వ్యక్తం చేశారు.
దక్షిణాది భాషల్లో పట్టు ఉన్న స్థానిక నటీమణులను పక్కన పెట్టి, ముంబై నుండి వచ్చే నటీమణులను తీసుకురావడం భావ్యం కాదని రాధికా ఆప్టే పేర్కొన్నారు. బాష తెలియక డబ్బింగ్ చెప్పించుకునే నటీమణుల కంటే, స్థానిక భాష ప్రావీణ్యం మరియు అద్భుతమైన నటనా నైపుణ్యాలు ఉన్న దక్షిణ భారత నటీమణులకే మొదటి ప్రాధాన్యత ఇవ్వాలని ఆమె అభిప్రాయపడ్డారు. వర్ణ వివక్షతో కూడిన ఇటువంటి పద్ధతులను ప్రోత్సహించడం తనకు ఇష్టం లేకే దక్షిణాది సినిమాలకు దూరంగా ఉన్నానని స్పష్టం చేశారు. అలాగే సినిమా సెట్స్‌లో ఉండే వాతావరణం గురించి మాట్లాడుతూ, గతంలో పనులు స్నేహపూర్వకంగా, మర్యాదగా సాగినప్పటికీ, కొన్ని సందర్భాల్లో పరిచయాల పేరుతో ఊచితంగా పనులు చేయించుకునే పరిస్థితి ఉండేదని, అది తనకు ఇబ్బందిగా అనిపించేదని గుర్తుచేసుకున్నారు.
ప్రస్తుతం రాధికా ఆప్టే తన రాబోయే నెట్‌ఫ్లిక్స్ సిరీస్ అక్క ప్రమోషన్లలో బిజీగా ఉన్నారు. 1980ల నాటి నేపథ్యంలో తెరకెక్కిన ఈ గ్యాంగ్‌స్టర్ డ్రామాలో ఆమె రుద్ర అనే శక్తివంతమైన పాత్రలో కనిపించనున్నారు. కీర్తి సురేష్ తో కలిసి నటిస్తున్న ఈ ప్రాజెక్ట్‌పై ప్రేక్షకుల్లో ఇప్పటికే భారీ అంచనాలు నెలకొన్నాయి. సౌత్ ఫిల్మ్ ఇండస్ట్రీపై రాధికా చేసిన వ్యాఖ్యలు ప్రస్తుతం సోషల్ మీడియాలోనూ, సినీ వర్గాల్లోనూ తీవ్ర చర్చనీయాంశంగా మారాయి.
