నటుడు నాసర్ కీలక ప్రకటన.. డిసెంబర్లో నూతన భవన ప్రారంభోత్సవం, రజనీ సన్మానంపై క్లారిటీ
దక్షిణ భారత నూతన సంఘం అధ్యక్షుడిగా కొనసాగుతున్న ప్రముఖ నటుడు నాసర్ ఇటీవల జరిగిన 70వ సాధారణ సమావేశంలో సినీ పరిశ్రమకు సంబంధించిన పలు కీలక అంశాలను మీడియా ముఖంగా వెల్లడించారు. సంఘం నూతన భవన నిర్మాణ పనులు ప్రస్తుతం తుది దశకు చేరుకున్నాయని, డిసెంబర్ ప్రారంభం నాటికి ఈ చారిత్రాత్మక భవనాన్ని ప్రారంభించేందుకు సన్నాహాలు చేస్తున్నట్లు ఆయన స్పష్టం చేశారు. ఈ ప్రారంభోత్సవ వేడుకకు తమిళనాడు ముఖ్యమంత్రి విజయ్ ముఖ్య అతిథిగా హాజరై తన చేతుల మీదుగా భవనాన్ని ప్రారంభిస్తారని నాసర్ ధృవీకరించారు. భవన నిర్మాణానికి తమ వంతు విరాళాలు అందించిన నటులు ధనుష్, విజయ్తో పాటు ఆర్థికంగా అండగా నిలిచిన ప్రతి ఒక్కరికీ ఈ సందర్భంగా ప్రత్యేక కృతజ్ఞతలు తెలిపారు.
సోషల్ మీడియా వేదికగా నటీనటులపై జరుగుతున్న తప్పుడు ప్రచారాలు మరియు అసభ్యకర వ్యాఖ్యలపై నాసర్ తీవ్ర స్థాయిలో ఆగ్రహం వ్యక్తం చేశారు. కేవలం పబ్లిసిటీ కోసం, ఆర్థిక లబ్ది కోసం ప్రముఖుల వ్యక్తిగత జీవితాలపై విషం చిమ్ముతున్న కొందరిపై ఇప్పటికే చట్టపరమైన చర్యలు ప్రారంభించామని, దాదాపు తొమ్మిది మందిపై ఎఫ్ఐఆర్ కూడా నమోదు చేసినట్లు ఆయన హెచ్చరించారు. ఇక టాలీవుడ్, కోలీవుడ్ దిగ్గజ నటుడు సూపర్స్టార్ రజనీకాంత్ ఐదు దశాబ్దాల అద్భుతమైన సినీ ప్రస్థానం పూర్తి చేసుకున్న సందర్భంగా ఘనంగా సన్మాన వేడుక నిర్వహించాలని భావించినప్పటికీ, రజనీకాంత్కు అందులో ఆసక్తి లేకపోవడంతో ఆ ఆలోచనను విరమించుకున్నట్లు ఆయన వివరించారు. రాజకీయాలకు, భేదాభిప్రాయాలకు అతీతంగా సినీ పరిశ్రమ అంతా ఒకే కుటుంబంలా కలిసికట్టుగా ఉంటూ సభ్యుల సంక్షేమం కోసం నిరంతరం పాటుపడుతుందని నాసర్ స్పష్టం చేశారు.
