మదనపల్లె పట్టణంలో రూ.27 కోట్లతో అభివృద్ధి పనులకు శంకుస్థాపన

మదనపల్లె పట్టణంలో రూ.27 కోట్లతో అభివృద్ధి పనులకు శంకుస్థాపన
సీసీ, బీటీ రోడ్లు తదితర అభివృద్ధి పనులకు శ్రీకారం చుట్టిన ఎమ్మెల్యే షాజహాన్ బాషా
మదనపల్లె: ముఖ్యమంత్రి నారా చంద్రబాబు నాయుడు మున్సిపాలిటీల అభివృద్ధికి ప్రత్యేకంగా నిధులు కేటాయిస్తున్నారని, అందులో భాగంగా మదనపల్లె మున్సిపాలిటీ పరిధిలో వివిధ అభివృద్ధి పనుల కోసం రూ.27 కోట్ల నిధులు కేటాయించినట్లు ఎమ్మెల్యే షాజహాన్ బాషా తెలిపారు.
ఈ నిధులతో చేపట్టనున్న సీసీ రోడ్లు, బీటీ రోడ్లు, ఇతర మౌలిక వసతుల అభివృద్ధి పనులకు సోమవారం ఎమ్మెల్యే షాజహాన్ బాషా శంకుస్థాపన చేశారు. మున్సిపల్ కమిషనర్ ప్రమీల ఆధ్వర్యంలో నిర్వహించిన కార్యక్రమానికి ఎమ్మెల్యే ముఖ్యఅతిథిగా హాజరై శంకుస్థాపన పలకాన్ని ఆవిష్కరించారు.
అనంతరం ఎమ్మెల్యే షాజహాన్ బాషా మీడియాతో మాట్లాడుతూ.. మదనపల్లె మున్సిపాలిటీ అభివృద్ధి కోసం ముఖ్యమంత్రి చంద్రబాబు నాయుడు రూ.27 కోట్ల నిధులు కేటాయించడం జరిగిందన్నారు. ఇప్పటికే మదనపల్లె నియోజకవర్గంలో సుమారు రూ.100 కోట్లతో వివిధ అభివృద్ధి కార్యక్రమాలను చేపట్టినట్లు తెలిపారు. తాజాగా మంజూరైన నిధులతో పట్టణంలోని పలు ప్రాంతాల్లో సీసీ రోడ్లు, బీటీ రోడ్లు తదితర అభివృద్ధి పనులను చేపట్టి ప్రజలకు మెరుగైన మౌలిక వసతులు కల్పించనున్నట్లు వెల్లడించారు.
ప్రజలకు అవసరమైన మౌలిక వసతుల కల్పనకు ప్రభుత్వం ప్రాధాన్యత ఇస్తోందని, అభివృద్ధి పనులను నాణ్యతా ప్రమాణాలతో పూర్తి చేసేలా అధికారులు చర్యలు తీసుకోవాలని ఎమ్మెల్యే సూచించారు.
ఈ కార్యక్రమంలో టౌన్ బ్యాంక్ చైర్మన్ నాదెల విద్యాసాగర్, నవీన్ చౌదరి, కమలామరి కృష్ణ, ఎస్.ఎం. రఫీ, పోతబోలు సుధాకర్‌తో పాటు తెలుగుదేశం పార్టీ నాయకులు, కార్యకర్తలు, మున్సిపల్ అధికారులు తదితరులు పాల్గొన్నారు.