గాయత్రి మంత్రం ఆలపించిన మాల్తీ మేరీ.. షూటింగ్ సెట్లో ప్రియాంక చోప్రా కూతురి సందడి!
సూర్య ఎంటర్టైన్మెంట్ డెస్క్: గ్లోబల్ స్టార్ ప్రియాంక చోప్రా తన కుమార్తె మాల్తీ మేరీ చోప్రా జోనాస్తో కలిసి గడిపిన మధుర క్షణాలను అభిమానులతో పంచుకున్నారు. షూటింగ్ బిజీలో ఉన్నప్పటికీ తన కుమార్తెతో సమయం గడపడానికి ఎప్పుడూ ప్రాధాన్యత ఇస్తానని, వీలు కుదిరినప్పుడల్లా సెట్స్కు కూడా వెంట తీసుకెళ్తానని తెలిపారు. తాజాగా ఇన్స్టాగ్రామ్లో పంచుకున్న ఫొటోలు, వీడియోలలో మాల్తీ మేరీ గాయత్రి మంత్రాన్ని ఆలపిస్తున్న దృశ్యం అందరి దృష్టిని ఆకర్షిస్తోంది.
ఇంటిలోని చిన్న ఆలయం ముందు ప్రియాంక ఒడిలో కూర్చుని మాల్తీ మేరీ చక్కని స్వరంతో గాయత్రి మంత్రాన్ని పఠించింది. మంత్రోచ్ఛారణ పూర్తయిన తర్వాత ప్రియాంక తన కుమార్తె గాత్రాన్ని ప్రశంసిస్తూ మురిసిపోయారు. విదేశాల్లో నివసిస్తున్నప్పటికీ తమ కుమార్తెకు భారతీయ సంస్కృతి, సంప్రదాయాలను పరిచయం చేస్తూ ప్రియాంక పెంచుతున్న తీరుపై నెటిజన్లు ప్రశంసలు కురిపిస్తున్నారు.
మరోవైపు షూటింగ్ సెట్లో మాల్తీ మేరీ చేసిన సందడికి సంబంధించిన ఫొటోలు కూడా ఆసక్తిని రేకెత్తిస్తున్నాయి. ప్రొడ్యూసర్ అని రాసి ఉన్న హెడ్ఫోన్స్ ధరించి, స్క్రిప్ట్ చదువుతూ కనిపించిన మాల్తీ ఫొటోలు అభిమానులను అలరిస్తున్నాయి. సముద్ర తీరంలో కుటుంబ సభ్యులతో సరదాగా గడిపిన క్షణాలను కూడా ప్రియాంక ఈ పోస్టులో జత చేశారు.
ప్రస్తుతం ప్రియాంక చోప్రా హాలీవుడ్ ప్రాజెక్ట్ బ్లూఫ్లై షూటింగ్తో బిజీగా ఉన్నారు. మరోవైపు ఎస్ఎస్ రాజమౌళి దర్శకత్వంలో మహేశ్ బాబు హీరోగా తెరకెక్కుతున్న వారణాసి చిత్రంతో ఆమె భారతీయ సినిమాలోకి పునరాగమనం చేయనున్నారు. ఈ భారీ అడ్వెంచర్ చిత్రం 2027 ఏప్రిల్ 7న ప్రపంచవ్యాప్తంగా విడుదల కానుంది.
Also Read: ఆర్యన్ ఖాన్ సృజనాత్మక శైలి వేరు.. షారుఖ్ తనయుడిపై విశాల్ భరద్వాజ్ ఆసక్తికర వ్యాఖ్యలు!