దేశం విడిచి వెళ్లాలంటూ నోటీసులు.. బాంబే హైకోర్టును ఆశ్రయించనున్న నటుడు ఇమ్రాన్ ఖాన్

సూర్య ఎంటర్‌టైన్‌మెంట్ డెస్క్: ప్రముఖ బాలీవుడ్ నటుడు ఇమ్రాన్ ఖాన్‌కు సంబంధించి ముంబైలో పరిణామాలు వేగంగా మారుతున్నాయి. విదేశీ పౌరసత్వం కలిగి ఉండి భారత్‌లో నివసిస్తున్న ఆయనకు దేశం విడిచి వెళ్లాలంటూ రీజినల్ రిజిస్ట్రేషన్ ఆఫీస్ అధికారులు స్పష్టమైన ఆదేశాలు జారీ చేశారు. అక్టోబర్ 28లోగా దేశం విడిచి వెళ్లాలని పేర్కొంటూ జారీ చేసిన ఈ నోటీసులను సవాలు చేస్తూ ఆయన తరఫు న్యాయవాదులు బాంబే హైకోర్టును ఆశ్రయించనున్నట్లు అధికారికంగా వెల్లడించారు. ఈ పరిణామంతో బాలీవుడ్ వర్గాల్లో తీవ్ర చర్చనీయాంశమైంది.

ముంబైలోని ఆగ్స్ట్ క్రాంతి మైదాన్‌లో ఇటీవల జరిగిన ప్రభుత్వ వ్యతిరేక నిరసన ప్రదర్శనల్లో ఇమ్రాన్ ఖాన్ పాల్గొనడం ఈ వివాదానికి ప్రధాన కారణమైంది. ప్రధాన ఎన్నికల కమిషనర్‌కు వ్యతిరేకంగా జరిగిన ఈ ఆందోళనలో ఆయన పాల్గొనగా, శాంతిభద్రతల పరిరక్షణ నిమిత్తం పోలీసులు ఆయనను అదుపులోకి తీసుకున్నారు. అయితే, ఆయన అమెరికా పౌరసత్వం కలిగి ఉండటం మరియు ఓవర్సీస్ సిటిజన్ ఆఫ్ ఇండియా కార్డ్ హోడాకర్‌గా ఉండటం వల్ల విదేశీయుల చట్టం నిబంధనలను ఉల్లంఘించారనే ఆరోపణలు వెల్లువెత్తాయి. రాజకీయ నిరసనల్లో విదేశీ పౌరులు పాల్గొనకూడదనే నిబంధనను ఉటంకిస్తూ ఎఫ్‌ఆర్‌ఆర్వో అధికారులు ఈ నోటీసులు జారీ చేశారు.

ఈ నిరసనల్లో తాను కేవలం ఒక సాధారణ పౌరుడిగా మాత్రమే పాల్గొన్నానని, ప్రజల గొంతును అణచివేయడంపై ప్రశ్నించేందుకే వచ్చానని ఇమ్రాన్ ఖాన్ స్పష్టం చేశారు. అయినప్పటికీ అధికారిక యంత్రాంగం నుండి వచ్చిన అల్టిమేటంతో ఉద్రిక్తత నెలకొంది. దీనిపై న్యాయపరంగా పోరాడాలని నిర్ణయించుకున్న నటుడి న్యాయ బృందం, బాంబే హైకోర్టులో అత్యవసర పిటిషన్ దాఖలు చేసేందుకు సన్నాహాలు చేస్తోంది. నిర్ణీత గడువులోగా కోర్టులో పిటిషన్ దాఖలు చేసి స్టే తెచ్చే ప్రయత్నాల్లో భాగంగా లీగల్ టీమ్ కసరత్తు వేగవంతం చేసింది.

Also Read: అనుపమపై కాసర్ల శ్యామ్ క్రేజీ కామెంట్స్.. 'అ' అంటే అనుపమ.. 'ఆ' అంటే ఆరాధన!