అక్టోబర్‌లో 54.7కి పడిపోయిన పీఎంఐ సూచీ.. ఎగుమతుల్లో మాత్రం రికార్డు జోరు
సూర్య బిజినెస్ డెస్క్: భారతీయ ప్యాక్టరీ రంగం వృద్ధిలో అక్టోబర్ నెలలో కొంత మందగమనం కనిపించినప్పటికీ, ఎగుమతుల ఆర్డర్లు మాత్రం గత ఆరు నెలల గరిష్ట స్థాయిని తాకాయి. ఎస్‌అండ్‌పీ గ్లోబల్ సంస్థ తాజాగా విడుదల చేసిన గణాంకాల ప్రకారం, భారత్ మ్యానుఫ్యాక్చరింగ్ పర్చేజింగ్ మేనేజర్స్ ఇండెక్స్ (PMI) సెప్టెంబర్ నెలలో నమోదైన 56.5 నుంచి అక్టోబర్‌లో 54.7కి పడిపోయింది. గత ఏడాదిన్నర కాలంలో ఈ స్థాయిలో పీఎంఐ పడిపోవడం ఇదే తొలిసారైనప్పటికీ, సూచీ 50 పాయింట్ల పైన కొనసాగుతుండటం వల్ల తయారీ రంగంలో వృద్ధి ధోరణి ఇంకా సానుకూలంగానే ఉందని నిపుణులు స్పష్టం చేస్తున్నారు.
కొత్త వ్యాపార ఆర్డర్ల వృద్ధి వేగం మందగించడం మరియు ఉత్పత్తి వృద్ధిలో కొంత నెమ్మది కనిపించడం ఈ పీఎంఐ తగ్గుదలకు ప్రధాన కారణాలుగా నిలిచాయి. అయినప్పటికీ అంతర్జాతీయ మార్కెట్ల నుంచి ముఖ్యంగా ఆసియా, ఐరోపా మరియు ఉత్తర అమెరికా ప్రాంతాల నుంచి దేశీయ తయారీదారులకు వస్తున్న ఎగుమతి ఆర్డర్లు గత ఆరు నెలల గరిష్ట స్థాయిని నమోదు చేశాయి. విదేశీ డిమాండ్ క్రమంగా బలపడుతుండటం పారిశ్రామిక వర్గాలకు ఎంతో ఊరటనిస్తోంది. ముడిసరుకుల ధరల పెరుగుదల భారం వినియోగదారులపై పడకుండా ఉండేందుకు కంపెనీలు ఉత్పత్తి వ్యయాన్ని నియంత్రించే చర్యలపై దృష్టి పెట్టాయి.
వ్యాపార భవిష్యత్తుపై తయారీ రంగ సంస్థలు అత్యంత ఆశాభావంతో ఉన్నట్లు సర్వే వెల్లడించింది. రాబోయే కాలంలో పండుగ సీజన్ డిమాండ్ మరియు కొత్త మార్కెట్ల విస్తరణ ద్వారా ఉత్పత్తి మళ్లీ పుంజుకుంటుందని వ్యాపార వర్గాలు అంచనా వేస్తున్నాయి. అంతర్జాతీయంగా ఆర్ధిక అనిశ్చితి నెలకొన్నప్పటికీ, బలమైన దేశీయ వినియోగం మరియు ప్రభుత్వ మద్దతు కారణంగా భారత మాన్యుఫ్యాక్చరింగ్ రంగం తన పట్టును నిలబెట్టుకుంటోందని ఆర్థిక విశ్లేషకులు అభిప్రాయపడుతున్నారు.
