వేతనంతో కూడిన సెలవు ఇవ్వాలి... * కార్మిక సహాయ అధికారి జయశంకర్ *

నరసన్నపేట, సూర్య : ఈ నెల 5వ తేదీన జరగనున్న ఎంపీటీసీ, జడ్పీటీసీ ఎన్నికల్లో కార్మికులు, ఉద్యోగులు ప్రతి ఒక్కరూ తప్పనిసరిగా తమ ఓటు హక్కును వినియోగించుకోవాలని కార్మిక సహాయ అధికారి జయశంకర్ కోరారు. ఆంధ్రప్రదేశ్ కార్మిక శాఖ కమిషనర్, విజయవాడ వారి ఆదేశాల మేరకు ఈ ప్రకటన విడుదల చేసినట్లు తెలిపారు. సోమవారం నరసన్నపేటలోని తన కార్యాలయంలో ఆయన మాట్లాడుతూ.. అన్ని దుకాణాలు, సంస్థల్లో పనిచేస్తున్న కార్మికులు, చిన్నతరహా ఉద్యోగులు ఎన్నికల రోజున పోలింగ్‌లో పాల్గొని తమ ఓటు హక్కును వినియోగించుకోవాలని సూచించారు.

ఎన్నికల రోజున కార్మికులు, ఉద్యోగులకు యాజమాన్యాలు తప్పనిసరిగా వేతనంతో కూడిన సెలవు కల్పించాలని ఆదేశించారు. ఈ నిబంధనను ఉల్లంఘించి వేతనంతో కూడిన సెలవు ఇవ్వని యాజమాన్యాలపై కార్మిక శాఖ నిబంధనలు, ఉన్నతాధికారుల ఆదేశాల మేరకు తగిన చర్యలు తీసుకుంటామని హెచ్చరించారు. ఎవరైనా యాజమాన్యాలు ఎన్నికల రోజున వేతనంతో కూడిన సెలవు కల్పించకపోతే సంబంధిత కార్మికులు, ఉద్యోగులు వెంటనే నరసన్నపేట కార్మిక శాఖ కార్యాలయానికి సమాచారం అందించాలని కోరారు. ఓటు హక్కు ప్రజాస్వామ్యంలో ప్రతి ఒక్కరికీ కల్పించిన విలువైన హక్కు అని, కార్మికులు, ఉద్యోగులు ఎవరూ ఓటు వేయకుండా ఉండకూడదని జయశంకర్ స్పష్టం చేశారు.