మల్లిపల్లి కూటమిలో చేరిన 11 కుటుంబాలు.

కళ్యాణదుర్గం:  రూరల్ మండల పరిధిలోని మల్లిపల్లి గ్రామంలో కూటమి జడ్పీటీసీ, ఎంపీటీసీ అభ్యర్థుల తరఫున ఎన్నికల ప్రచారం ఉత్సాహంగా సాగింది. ఎమ్మెల్యే అమిలినేని సురేంద్రబాబు సూచనల మేరకు యువ నాయకుడు దేవినేని అవినాష్ గ్రామంలో పర్యటించి కూటమి అభ్యర్థులకు మద్దతుగా ప్రచారం నిర్వహించారు. ఈ సందర్భంగా గ్రామానికి చేరుకున్న ఆయనకు టీడీపీ నాయకులు, కార్యకర్తలు, స్థానిక ప్రజలు ఘన స్వాగతం పలికారు. అనంతరం గ్రామంలోని వివిధ ప్రాంతాల్లో స్థానిక నాయకులతో కలిసి పర్యటిస్తూ కూటమి అభ్యర్థులను గెలిపించాలని ఓటర్లను అభ్యర్థించారు. ఎన్నికల్లో పార్టీ శ్రేణులంతా సమన్వయంతో పనిచేసి అభ్యర్థుల విజయానికి కృషి చేయాలని పిలుపునిచ్చారు. మల్లిపల్లిలో నిర్వహించిన ఎన్నికల ప్రచార కార్యక్రమంలో రాజకీయంగా ప్రాధాన్యత సంతరించుకున్న పరిణామం చోటుచేసుకుంది. దేవినేని అవినాష్ సమక్షంలో వైఎస్సార్ కాంగ్రెస్ పార్టీకి చెందిన 11 కుటుంబాలు తెలుగుదేశం పార్టీలో చేరాయి. సూర్యనారాయణ రావు, గొల్ల శ్రీనివాసులు, గొల్ల వెంకటేష్, ఊరుగొల్ల నాగార్జున, చాకలి తిప్పేస్వామి, గొల్ల శివలింగ, గొల్ల రాంబాబు, గొల్ల తిప్పేస్వామి, గొల్ల తిప్పన్న, మాదిగ ఎర్రిస్వామి, మాదిగ మల్లికార్జున టీడీపీ కండువాలు కప్పుకుని పార్టీలో చేరారు. ఈ సందర్భంగా దేవినేని అవినాష్ వారికి పార్టీ కండువాలు కప్పి సాదరంగా ఆహ్వానించారు. కూటమి ప్రభుత్వ పాలన, ఎమ్మెల్యే అమిలినేని సురేంద్రబాబు చేపడుతున్న అభివృద్ధి కార్యక్రమాల పట్ల ఆకర్షితులై టీడీపీలో చేరినట్లు వారు పేర్కొన్నారు. ఈ సందర్భంగా దేవినేని అవినాష్ మాట్లాడుతూ రాష్ట్రంలో అభివృద్ధి, సంక్షేమ కార్యక్రమాలు నిరంతరాయంగా కొనసాగాలంటే స్థానిక సంస్థల ఎన్నికల్లో కూటమి అభ్యర్థులకు ప్రజలు మద్దతు పలకాలని కోరారు. ఎమ్మెల్యే అమిలినేని సురేంద్రబాబు నియోజకవర్గంలో చేపడుతున్న అభివృద్ధి కార్యక్రమాలను ప్రజలు గమనించాలని, పార్టీలకు అతీతంగా ప్రాంత అభివృద్ధిని దృష్టిలో ఉంచుకుని తమ నిర్ణయం తీసుకోవాలని సూచించారు. రాబోయే రోజుల్లో కళ్యాణదుర్గం నియోజకవర్గాన్ని మరింత అభివృద్ధి పథంలో నడిపించేందుకు కూటమి అభ్యర్థుల విజయం అవసరమన్నారు. ఎమ్మెల్యే సురేంద్రబాబు చేస్తున్న అభివృద్ధి కార్యక్రమాలను విశ్వసించి వైఎస్సార్‌సీపీకి చెందిన నాయకులు, కుటుంబాలు టీడీపీలో చేరడం శుభపరిణామమని పేర్కొన్నారు. రాజకీయాలకు అతీతంగా గ్రామాల అభివృద్ధి కోసం ప్రతి ఒక్కరూ ముందుకు రావాలని, ఎమ్మెల్యేకు అండగా నిలవాలని పిలుపునిచ్చారు. స్థానిక సంస్థల్లో కూటమి అభ్యర్థులు విజయం సాధిస్తే గ్రామాల్లో మౌలిక సదుపాయాల కల్పన, అభివృద్ధి పనులకు మరింత ఊతం లభిస్తుందని అన్నారు. ఈ కార్యక్రమంలో టీడీపీ నాయకులు, కూటమి శ్రేణులు, కార్యకర్తలు, గ్రామస్థులు పాల్గొన్నారు.

కళ్యాణదుర్గం టౌన్ రిపోర్టర్ :- బోయ రంగస్వామి.