విజేతలకు అభినందనలు తెలిపిన కేంద్ర మంత్రి రామ్మోహన్...
శ్రీకాకుళం, సూర్య : ఇటీవల జరిగిన స్థానిక సంస్థల ఎన్నికల్లో ఎంపీటీసీ, జెడ్పీటీసీ సభ్యులుగా విజయం సాధించిన కూటమి అభ్యర్థులు సోమవారం కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడును మర్యాదపూర్వకంగా కలిశారు. శ్రీకాకుళం నగరంలోని ప్రజాసదన్‌లో ఉదయం 10 గంటల నుంచి సాయంత్రం 3:30 గంటల వరకు ఈ ఆత్మీయ సమావేశం కొనసాగింది. ఉమ్మడి శ్రీకాకుళం జిల్లా నలుమూలల నుంచి తరలివచ్చిన కూటమి ప్రజాప్రతినిధులు, నాయకులు, కార్యకర్తలను కేంద్ర మంత్రి ఆప్యాయంగా పలకరించారు.
ఈ సందర్భంగా స్థానిక సంస్థల ఎన్నికల్లో ఘన విజయం సాధించిన అభ్యర్థులకు శుభాకాంక్షలు తెలియజేసిన కేంద్ర మంత్రి, ప్రజలు తమపై ఉంచిన నమ్మకాన్ని నిలబెట్టుకుంటూ ప్రజాసేవకు అంకితభావంతో పనిచేయాలని సూచించారు. గ్రామీణ, పట్టణ ప్రాంతాల్లో నెలకొన్న స్థానిక సమస్యల పరిష్కారంతో పాటు అభివృద్ధి కార్యక్రమాలను ముందుకు తీసుకెళ్లేందుకు ప్రజాప్రతినిధులందరూ సమన్వయంతో పనిచేయాలని పిలుపునిచ్చారు. జిల్లాలో చేపట్టాల్సిన పలు అభివృద్ధి కార్యక్రమాలపై వారితో ప్రత్యేకంగా చర్చించారు.
ప్రధానమంత్రి నరేంద్ర మోదీ, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్ ల నాయకత్వంలో డబుల్ ఇంజిన్ సర్కారుగా ముందుకు సాగుతున్న కూటమి ప్రభుత్వం.. స్థానిక సంస్థల ఎన్నికల్లో సాధించిన విజయంతో ట్రిపుల్ ఇంజిన్ వేగాన్ని సంతరించుకుందని కేంద్ర మంత్రి పేర్కొన్నారు. రాష్ట్ర, కేంద్ర ప్రభుత్వాలు అమలు చేస్తున్న అభివృద్ధి, సంక్షేమ కార్యక్రమాల ఫలాలను క్షేత్రస్థాయిలో ప్రతి ఒక్కరికీ చేరువ చేయడంలో స్థానిక సంస్థల ప్రజాప్రతినిధులు కీలక పాత్ర పోషించాలని అన్నారు. ప్రజల ఆకాంక్షలకు అనుగుణంగా కలిసికట్టుగా పనిచేస్తూ శ్రీకాకుళం జిల్లాను అభివృద్ధి పథంలో మరింత ముందుకు తీసుకెళ్లాలని పిలుపునిచ్చారు.
ఈ కార్యక్రమంలో శ్రీకాకుళం ఎమ్మెల్యే గొండు శంకర్, వంశధార ప్రాజెక్టు కమిటీ చైర్మన్ అరవల రవీంద్ర, తెలుగు యువత జిల్లా అధ్యక్షుడు మెండ దాసునాయుడు తదితరులు పాల్గొన్నారు.
