వరి పంటలో తెగుళ్లు, పురుగుల నివారణకు సకాలంలో చర్యలు చేపట్టాలి.
అనపర్తి, మేజర్ న్యూస్.వరి పంట చివరి దశలో ప్రస్తుత వాతావరణ పరిస్థితుల నేపథ్యంలో తెగుళ్లు, పురుగుల ఉద్ధృతిపై రైతులు అప్రమత్తంగా ఉండాలని ఆచార్య ఎన్‌.జి. రంగా వ్యవసాయ విశ్వవిద్యాలయం ఏరువాక కేంద్రం సమన్వయకర్త డా. మానుకొండ శ్రీనివాస్ సూచించారు. బిక్కవోలు మండలంలోని తొస్సిపూడి, పందలపాక, మెల్లూరు గ్రామాల్లో పర్యటించి వరి పంటలను పరిశీలించిన ఆయన రైతులకు పలు సూచనలు చేశారు.
ప్రస్తుతం వరి పంటలో ఎర్రనల్లి, ఆకుముడత పురుగు, పాముపొడ తెగులు సమస్యలు కనిపిస్తున్నాయని, వీటి నివారణకు వ్యవసాయ శాఖ అధికారుల సూచనల మేరకు తగిన మందులను సరైన మోతాదులో వినియోగించాలని తెలిపారు. సుడిదోమ ఉద్ధృతిని ఎప్పటికప్పుడు గమనిస్తూ, అవసరమైనప్పుడే నివారణ చర్యలు చేపట్టాలని సూచించారు. పురుగుల నివారణ మందులను విచక్షణారహితంగా వినియోగించరాదని పేర్కొన్నారు.
రానున్న రబీ సీజన్‌లో సాగునీటి లభ్యతను బట్టి పంటలను ఎంపిక చేసుకోవాలని, నీటి వనరులు తక్కువగా ఉన్న ప్రాంతాల్లో మినుము, పెసర, జొన్న, సజ్జ, రాగి, మొక్కజొన్న వంటి పంటల సాగుకు ప్రాధాన్యమివ్వాలని సూచించారు. నీటి వనరులను సమర్థంగా వినియోగించుకుంటూ సాగు ఖర్చులను నియంత్రించుకోవాలని రైతులకు పిలుపునిచ్చారు.ఈ పర్యటనలో అనపర్తి వ్యవసాయ సహాయ సంచాలకులు డి.వి. కృష్ణ, బిక్కవోలు మండల వ్యవసాయ అధికారి జి. వాణి, వ్యవసాయ విస్తరణ అధికారి శ్రీనివాసు, గ్రామ వ్యవసాయ సహాయకులు, రైతులు పాల్గొన్నారు.
