*వాహనదారులకు విద్యార్థుల కౌన్సెలింగ్ ఎస్సై కుటుంబరావుగారు*

జంగారెడ్డిగూడెం:రోడ్డు భద్రతపై అవగాహన కల్పించేందుకు విద్యార్థులు వినూత్నంగా ముందడుగు వేశారు. పట్టణంలోని పాత ఎమ్మార్వో కార్యాలయం రోడ్డులో విద్యార్థులు వాహనదారులను ఆపి ట్రాఫిక్ నిబంధనలపై కౌన్సెలింగ్ నిర్వహించారు. ద్విచక్ర వాహనదారులు హెల్మెట్ ధరించారా, వాహనాలను జాగ్రత్తగా నడుపుతున్నారా అనే విషయాలను పరిశీలిస్తూ విద్యార్థులు అవగాహన కల్పించారు. హెల్మెట్ లేకుండా ప్రయాణిస్తున్న వాహనదారులకు హెల్మెట్ ప్రాధాన్యతను వివరించారు. వాహనం నడిపే సమయంలో సెల్‌ఫోన్ వినియోగించవద్దని, అతివేగంగా వాహనాలు నడపడం వల్ల ప్రమాదాలు జరిగే అవకాశం ఉందని సూచించారు. రహదారిపై ట్రాఫిక్ నిబంధనలు పాటించాలని, ఇతర వాహనదారులకు ఇబ్బంది కలగకుండా జాగ్రత్తగా ప్రయాణించాలని కోరారు. వాహనదారులతో నేరుగా మాట్లాడి రోడ్డు భద్రతపై అవగాహన కల్పించడం ద్వారా విద్యార్థులు తమ సామాజిక బాధ్యతను చాటుకున్నారు. విద్యార్థులు నిర్వహించిన కౌన్సెలింగ్ కార్యక్రమాన్ని ఎస్సై కుటుంబరావు దగ్గర ఉండి పర్యవేక్షించారు. ఈ సందర్భంగా ఆయన మాట్లాడుతూ రోడ్డు ప్రమాదాల నివారణకు ప్రతి ఒక్కరూ ట్రాఫిక్ నిబంధనలు పాటించాలని సూచించారు. చిన్నపాటి నిర్లక్ష్యం కూడా ప్రాణాంతక ప్రమాదాలకు దారితీసే అవకాశం ఉందని, వాహనదారులు అప్రమత్తంగా వ్యవహరించాలని తెలిపారు. విద్యార్థులు ప్రజల్లో రహదారి భద్రతపై అవగాహన కల్పించేందుకు చేపట్టిన కార్యక్రమం పట్ల పలువురు వాహనదారులు అభినందనలు తెలిపారు